VIKEKE, 12 Dezembru 2025 (TATOLI)—Prezidente Kooperativa HAMSIFOR, Mateus Soares informa Ministériu Komérsiu no Indústria (MKI) apoia mákina prosesamentu nuu-kulit nian ida ba Kooperativa HAMAIFOR husi Suku Bahalaraua’in, Postu Vikeke Vila, Munisípiu Vikeke.
“Ami foin lalais simu ona mákina prosesamentu dulas nuu-kulit nian ida. Ho mákina ne’e ita bele uza prodús nuu-kulit bele sai produtu seluk,” Mateus Soares ba TATOLI iha Postu Vikeke, Sesta ne’e.
Mateus esplika mákina ne’e Governu apoiu nia utilizasaun ba nuu-kulit bele prodús sai adubu, kapoti, tali no produtu sira seluk tan.
“Prosesamentu nuu-kulit ne’e ami agora daudaun prepara fatin produsaun. Ami planu tinan 2026 hahú halo atividade prosesa nuu-kulit,” nia subliña.
Mateus informa, kona-ba materiál prima nuu-kulit, Kooperativa HAMAIFOR sei halibur tanba nuu-kulit dalabarak ema la uza ka estraga de’it, ne’ebé ba materiál prima ne’e barak.
“Prosesamentu nuu-kulit sai produtu ne’e ami hetan ona formasaun husi Adventist Development and Relief Agency (ADRA). Tan ne’e, ami halo proposta ba ADRA, depoiz ADRA kanaliza ami-nia proposta ba MKI hodi apoia mákina ba ami. Ha’u sente husi mákina referida sei fó banefísiu ba ha’u-nia membru sira,” nia akresenta.
Entretantu, dadus membru Kooperativa HAMAIFOR ho totál hamutuk na’in-147 ne’ebé daudaun ativu hela iha kooperativa.
Jornalista: Vitorino Lopes da Costa
Editór: Xisto Freitas da Piedade
