DILI, 12 Dezembru 2025 (TATOLI)–Tribunál Judisiál Primeira Instánsia Dili (TJPID), Sesta ne’e, kontinua halo audiénsia julgamentu ba krime sekuestru no abuzu poder ne’ebé envolve husi membru FALINTIL-Forsa Defeza Timor-Leste (F-FDTL) iha tinan 2022.
Tribunál koletivu tau ba ajenda hodi halo alegasaun ba kazu ne’e. Nune’e, iha faze alegasaun, Ministériu Públiku (MP) liuhusi Prokuradór Titulár Aderito Tilman solisita ba Tribunál koletivu atu kondena arguidu na’in-tolu ho inisiál JXB, MdC no DNS ho pena prizaun tanba tuir prova arguidu sira envolve duni krime.
Iha alegasaun, Prokuradór Adérito Tilman deklara katak arguidu sira rona informasaun katak lezadu lori komandu sira-nia naran hodi halo kobransa ilegál ba komunidade iha Manatutu.
Lezadu no sasin fó depoimentu katak arguidu sira halo duni asaun hasoru nia, nune’e MP husu ba Tribunál atu kondena arguidu sira ho pena prizaun.
Enkuatu, husi arguidu sira-nia Defeza, Sergio Dias Quintas husu ba Tribunál koletivu atu liberta arguidu na’in-tolu husi krime ne’ebé MP imputa tanba tuir Defeza nia haree katak laiha provas atu kondena arguidu sira. Nune’e, Tribunál hafoin rona tiha alegasaun, marka fali loron seluk hodi rona desizaun.
Tuir faktu sufisiente katak iha loron 28 Janeiru 2022, tuku 20:30 kalan, arguidu JXB, kontaktu ba lezadu AS liuhusi telemóvel no konvida lezadu atu bá hemu kafé iha jardín Motael Dili, ho intensaun atu ko’alia kona-ba projetu eletrisidade.
Hafoin kontaktu lezadu ho nia kolega DP to’o iha fatin ne’ebé determina ona husi arguidu JXB, bainhira to’o iha fatin referidu, parte lezadu hasoru malu ho arguidu no sira dada-lia.
Lezadu haree arguidu haruka mensajen, maibé lezadu lahatene katak arguidu haruka mensajen ba sé. Hafoin lezadu ko’alia hela ho arguidu JXB, ema ne’ebé arguidu haruka mensajen ba ne’e lakleur de’it sira mós mai. Sira ne’e maka hanesan arguidu JXB, hamutuk ho arguidu MdC no DNS no ema sira ne’ebé nia la koñese no diretamente halo agresaun ba lezadu, tuku iha ibun, hirus matan no kuaze isin tomak.
Hafoin halo ataka fíziku ba lezadu no sira kontinua lori lezadu ba Kuartel Jeral PNTL iha Kaikoli Dili. Bainhira to’o iha sala investigasaun iha Kuartel Jeral PNTL Kaikoli Dili, arguidu DNS obriga lezadu asina dokumentu ne’ebé sira prepara tiha ona, maibe lezadu lakohi.
Nune, arguidu DNS tuku iha lezadu nia hasan sorin loos no kontinua tuku lezadu iha kakorok to’o monu ba rai no halo moras to’o kanek.
Notísia relevante : Tribunál absolve membru PNTL na’in-tolu husi kazu José Bernardo nia mate
Sira obriga lezadu atu asina dokumentu, maibe lezadu lakohi no arguidu DNS kaer lezadu nia liman hodi asina dokumentu.
Arguidu sira laiha autoridade atu detein ema seluk, maibé arguidu sira JXB, MdC no DNS uza sira-nia autoridade nu’udar membru F-FDTL hodi halo asaltu fíziku ba parte ne’ebé hetan kanek hodi obriga sira tenke asina dokumentu ne’ebé prepara ona.
Arguidu sira tula lezadu ho karreta ne’ebé laiha númeru xapa matríkula ba Kuartél Jerál PNTL, ne’ebé sira asalta ho fiu eletrisidade metan iha nia isin lolon tomak.
Arguidu sira, bainhira hala’o aktu sira ne’ebé deskreve, sira hatene katak lei bandu, sira atua ho livre, deliberada no konxiente, no la hadook-an husi hahalok hanesan ne’e. Sira hakarak atu estraga parte ne’ebé hetan kanek iha nia integridade fíziku hodi hamosu moras no kanek sira, ne’ebé maka akontese duni.
Arguidu sira tau lezadu iha sala investigasaun iha Kuartél Jerál PNTL no la konsege sai husi fatin, asalta nia ba objetivu ida-ne’e no nunee hasai nia liberdade, ne’ebé sira hotu hakarak halo ho livre ho konxiénsia.
Maizumenus iha tuku 23:00 kalan arguidu sira tula fali lezadu ne’ebé ho kondisaun grave ona iha karreta ida no husik hela iha área Palapasu, Dili.
Arguidu sira hatene didi’ak katak sira-nia hahalok hetan bandu no punível husi lei nu’udar krime, no nune’e viola dever sira ne’ebé iha sira-nia estatutu nu’udar membru F-FDTL no funsionáriu públiku sira, liuliu dever imparsialidade, laran manas, lealdade no integridade, hodi tau iha risku interese Estadu nian no legalidade asaun husi ninia orgaun hotu-hotu no ninia ajente sira-nia onestidade, nu’udar indispensável ba kondisaun sira ezersísiu ba sira-nia funsaun públika.
Tanba ne’e, MP akuza arguidu na’in-tolu komete krime sukuestru no abuju poder ne’ebé previstu iha artigu 160 no artigu 297.
Audiénsia julgamentu ne’e prezide husi Juíz Kolektivu Ana Paula, Ersilia de Jesus, José Maria, MP reprezenta husi Prokuradór Adérito Tilman, arguidu sira hetan asisténsia legál husi Defensór Públiku Sérgio Dias Quintas.
Jornalista : Natalino Costa
Editora : Julia Chatarina
