DILI, 12 Dezembru 2025 (TATOLI)–Selesaun Nasionál Futeból Timor-Leste U-22 eliminadu husi SEA Games 2025 hafoin ekipa Vietname gaña vitória husi Malázia ho skor 0-2, iha Estádiu Anniversary Chiangmai, Bangkok, Kinta (11/12/2025).
Husi rezultadu ne’e, Timor-Leste falla kontinua bá meiu finál mezmu antes ne’e iha oportunidade bazeia ba kontajen pontu relasiona ho best ekipa runner up.
Ekipa Lafaek obrigadu tenke entrega tikete referida ba ekipa Malázia ne’ebé lidera hikas tabela klasifikasaun best runner up ho pontu tolu no produtividade golu ida.
Notísia relevante: SEA Games 2025, Timor-Leste rekolla pontu hanesan ho Thailándia
Enkuantu, Indonézia mezmu difísil tanba okupa iha pozisaun datoluk ho pontu 0 maibé sei iha oportunidade atu hakat bá faze meiu finál bainhira iha jogu ikus kontra Myanmar manán ho skor 3-0.
Timor-Leste rasik rekolla pontu tolu (3), kolokadu iha Grupu A hamutuk ho Tailándia ne’ebé sai kampiaun grupu ho pontu neen (6) no Singapura iha pozisaun datoluk ho pontu 0.
Entretantu, ekipa tolu ne’ebé serteja ona hakat bá meiu finál mak Tailándia iha Grupu A, Vietname iha Grupu B no Filipina iha Grupu C. Best runner up sei hein rezultadu jogu entre Indonézia no Myanmar ne’ebé tuir oráriu sei realiza iha Estádiu Anniversary Chiangmai, Bangkok, Sesta (12/12/2025).
Jornalista: Natalino Belo
Editór: Xisto Freitas da Piedade
