KOVALIMA, 12 Dezembru 2025 (TATOLI)-Servisu Munisipál Asaun Sosiál (SMAS) Sesta-ne’e, apoia osan $1.600 ba feto vulneravél na’in-ualu, husi postu administrativu Zumalai no postu administrasaun Suai, Munisípiu Kovalima.
Diretór Servisu Munisipál Asaun Sosiál (SMAS), Clementino Bere, esplika katak molok atu entrega osan ba benefisiáriu-sira ne’e, funsionáriu husi SMAS halo asesmentu dadus hodi haree sira-nia kondisaun, hafoin deside hodi entrega osan ba kada feto vulneravél ho montante $200.
“Ami ajuda ita-boot sira ho osan montante $200, ita-boot sira labele uza hotu ba nesesidade uma-laran, maibé balun uza hodi fila liman atu haforsa ita-boot sira nia ekonómia iha família”, Dirijente SMAS ne’e hato’o molok entrega osan ba benefisiáriu iha salaun postu Zumalai, ohin.
Finanseiru ne’e, nia dehan atu fasilita feto vulneravél sira liuliu hodi hakbi’it sira-nia ekonomia, sosa materiál eskola ba nia-oan sira no mós uza lori halo negósiu kiik nune’e bele iha sustentabilidade.
Atividade entrega osan ba benefisiáriu sira husi postu rua maka hanesan, postu Suai iha Suku Beco ho nia benefisiáriu na’in-rua no husi postu Administrativu Zumalai ho nia benefisiáriu na’in neen.
Dirijente SMAS mós fó hanoin ba benefisiáriu sira ne’ebé maka simu osan $200 tenke uza ho kuidadu no uza ba nesesidade família, maibé labele uza osan lori ba joga no ba halo kultura.
Iha fatin hanesan, Reprezentante Administradór Postu Administrativu Zumalai, Fernando Magno, reforsa feto vulneravél ne’ebé hetan apoiu osan, tanba xefe suku sira maka identifika katak sira-nia kondisaun ne’e merese duni atu hetan apoiu finanseiru referidu.
“Ami autoridade postu apoiu programa husi SMAS oinsá hakbi’it ita-nia inan feton sira ne’ebé laiha kbi’it atu sustenta sira-nia familía uma-laran,” katak nian.
Autoridade postu mós apelu ba feto vulneravél ne’ebé maka simu osan $200 labele uza ba joga no halo kultura, maibé uza osan ba nesesidade moris loroloron.
Entertantu, Feto vulneravél husi Postu Zumalai, Verónica Mesquita, sente kontente tanba bele hetan apoiu osan husi Servisu Munisipál Asaun Sosiál (SMAS), nune’e osan ne’e bele uza hodi halo negósiu kiik hanesan faan dosi ho modo no seluk tan.
“ Ha’u kontente tanba bele hetan apoiu osan uitoan, nune’e ha’u bele fila liman tanba durante ne’e ha’u hasoru difikuldade ho osan. Ha’u nia planu maka sosa terigu nune’e bele faan dosi no rai osan hodi selu oan nia eskola ”, benefisiáriu ne’e agardese.
Jornalista: Celestina Teles
Editór:Florencio Miranda Ximenes
