DILI, 12 Dezembru 2025 (TATOLI)—Reprezentante Federasaun Atletizmu Defisiénsia Timor-Leste, sesta ne’e, hasoru malu ho Prezidente Repúblika José Ramos-Horta hodi fó sai kona-ba Timor-Leste rekolla medalla osan-mean iha jogu mundiál abilidade 2025 ne’ebé hala’o iha Tailándia foin lalais.
Jogu mundiál abilidade 2025 ne’e konklui iha Nakhon Ratchasima, Tailándia hala’o iha loron 17-24 fulan-Novembru 2025 liuba, ne’ebé partisipa husi nasaun hamutuk 38 inklui Timor-Leste.
“Ohin, ami hasoru malu ho Prezidente Repúblika hodi fó sai eventu ne’ebé ami partisipa iha Nakhon Ratchasima, Tailándia, ne’ebé hanaran jogu abilidade mundiál 2025. Ida-ne’e mak ba dahuluk Timor-Leste partisipa hamutuk ho nasaun 38. Ita-nia atleta sira manán medalla osan-mean iha sprint metru 400,” Sekretáriu Jerál Komité Paralímpiku Nasionál Timor-Leste, José da Silva Monteiro, hateten ba jornalista sira hafoun hasoru malu ho Xefe Estadu iha Palásiu Prezidensiál Nicolau Lobato, Bairru Pite.
Nia hatutan, Timor-Leste partisipa iha kompetisaun ne’e hafoin hetan konvite direta husi Liurai Tailándia.
“Iha kompetisaun ne’ebé ami partisipa iha momentu ne’ebá, ami seidauk sai membru no agora ami rejistu ona ba adezaun atu nune’e iha tinan sira tuir mai, hanesan 2026 no 2027, no ba oin, Timor-Leste bele partisipa fali iha kategoria Juniór no Seniór iha Turkia,” nia dehan.
Prezidente Repúblika mós hato’o parabéns ba atleta sira-ne’ebé hetan medalla osan-mean no husu ba sira atu prepara-aan ba Maratona Dili Internasionál tinan oin.
Prezidente Federasaun Atletizmu Timor-Leste ba Ema ho Defisiénsia, Rudy Yanto Kwa, espresa orgullu tanba Bandeira Timor-Leste hasa’e iha estádiu Tailándia durante kompetisaun.
“Iha jogu mundiál ability Sport 2025 iha Tailándia, ami manán medalla osan-mean ida (1). Bandeira ita-nian hasa’e, no hananu ita-nia inu nasionál iha estádiu,” nia hateten ho orgullu.
Nia dehan, atleta ne’ebé partisipa iha jogu ne’e hamutuk na’in-rua (2), feto ida (1) no mane ida (1), mane partisipa iha lansamentu javelina no feto partisipa iha eventu halai, mak konsege hetan medalla osan-mean ka primeiru lugar.
Treinadór husi atleta rua (2) ne’e, Aguida Fatima Amaral sente emosionadu tanba ida-ne’e foin dahuluk nia atleta sira reprezenta feto hodi manán medalla osan-mean ba Timor-Leste.
“Ami kontente tebes hasoru Prezidente. Hanesan treinadór ba atleta na’in-rua (2) ne’e, ha’u sente orgullu tebes tanba ha’u nia atleta, Domingas, hetan medalla osan-mean. Ida-ne’e mak primeira vez atleta feto ida ho defisiénsia manán medalla osan-mean ba Timor-Leste,” nia dehan.
Jornalista : Hortencio Sanchez
Editór : Cancio Ximenes
