Xanana husu uza matadalan ASEAN solusiona konflitu Tailándia-Kamboja
DILI, 12 Dezembru 2025 (TATOLI) – Primeiru-Ministru (PM), Kay Rala Xanana Gusmao, husu uza matadalan ASEAN nian liuhusi apromisaun hodi solusiona konflitu entre Tailándia no Kamboja.
“Iha tempu sira hanesan ne’e, valór sentrál sira ASEAN nian tenke sai hanesan ita-nia matadalan ne’ebé fahe,” Xefe Governu hatete iha nia diskursu polítiku relasiona ho polítika Timor-Leste nian hanesan membru plenu da-11 ASEAN nian iha Sekretariadu ASEAN nian, iha Jakarta, kinta ne’e.
“Ami husu ba governu rua atu ezerse restrisaun no fila-fali ba meza negosiasaun liuhosi mekanizmu bilaterál no ASEAN nian ne’ebé konsistente ho Karta ASEAN nian, Tratadu amizade no kooperasaun nian,” nia hatutan.
ASEAN oras ne’e daudaun hanesan ezemplu susesu unidade rejionál ne’ebé mantein iha divizaun entre nasaun sira iha nível mundiál tanba mantein ho susesu ninia kompromisu kompartilladu hodi realiza sentralidade ASEAN nian, nia hatete.
Maibé, kompromisu ne’e hetan hela teste tuir eskalasaun konflitu entre Tailándia no Kamboja. Nasaun rua ne’e asina ona akordu dame iha Simeira ASEAN ba dala-47 iha Kuala Lumpur, fulan Outubru liubá, Primeiru-Ministru haktuir.
“Ami preokupa ho konfrontu sira ne’ebé akontese iha fronteira Kamboja-Tailándia,” dehan Xanana.
Nia alerta mós katak konflitu entre Estadu-membru rua ASEAN nian labele estraga esforsu hamutuk sira hodi avansa dezenvolvimentu no estabilidade rejionál.
“Tanba ne’e maka ASEAN tenke mantein estavel no proativu,” nia hatete.
“ASEAN tenke halo buat hotu ne’ebé nia bele hodi apoia dez-eskalasaun efetivu no rezolusaun negosiadu ida hosi konflitu ne’ebé harii baze ba dame iha prazu naruk,” Xefe Governu fó hanoin.
Hafoin funu nakloke tún iha tinan ne’e nia klaran liuhosi akordu ida sesarfogu nian, tensaun sira iha fronteira Tailándia-Kamboja aumenta fali dezde findesemana liubá, ho parte rua akuza malu tanba viola sesarfogu.
Konfrontu ikus sira dezde loron-segunda (8 Dezembru) hamate ona ema sivíl kambojanu na’in-sia no soldadu tailandés na’in-neen, no halo ema liu meiu millaun deslokadu iha fronteira nia sorin, ho Bangkok uza aviaun F-16 hodi bombardeia nia viziñu súl.
Notísia relevante: Liurai Tailándia aprova pedidu disolve parlamentu no marka eleisaun antesipada
Fonte: Antaranews
