Ramos-Horta entrega premiu ba manán-na’in konkursu “Harii Pás liuhusi arte públika”

DILI, 13 Dezembru 2025 (TATOLI)—Prezidente Repúblika, José Ramos-Horta, sesta ne’e,  entrega premiu ba manán-na’in sira ne’ebé kompete ona iha konkursu “Harii pás liuhusi arte públika” iha Palásiu Prezidensiál Nicolau Lobato, Bairru Pite.

Xefe estadu ne’e rekoñese artista sira-nia kriatividade no kompromisu, katak obra arte ida la’ós de’it sai hanesan dekorasaun de’it maibé liuhusi obra bele atinje pás.

“Obra arte públika forte sira-ne’e la’ós de’it dekorasaun; sira mak testemuña vibrante ba ita-nia espíritu nasionál no ita-nia atinji ba pás ne’ebé dura. Bainhira ita la’o ba faze ASEAN nian, sira espresa vizualmente ita-nia valór komún iha unidade no reziliénsia kreativa, hodi harii ponte sira komprensaun nian ne’ebé hahú iha ita-nia komunidade sira no habelar iha rejiaun tomak,” Ramos-Horta hateten iha nia diskursu.

Eventu ne’e destaka kbiit transformativu arte nian hodi haburas unidade nasionál no armonia rejionál, aliña ho adezaun istóriku Timor-Leste nian ba Asosiasaun Nasaun Sudeste Aziátiku (ASEAN).

Konkursu nasionál, inisiativa husi Prezidénsia Repúblika liuhusi Arte no Kultura. Apoiu ba Edukasaun, ho apoiu tékniku hosi Sekretaria Estadu Arte no Kultura (SEAK), envolve artista sira hosi munisípiu hotu-hotu.

Partisipante sira hetan knaar atu kria arte públika ne’ebé sai hanesan veíkulu ba espresaun koletiva no símbolu identidade kulturál, nune’e hametin koezaun sosiál no sidadania ativu iha aliñamentu ho valór sira ASEAN nian.

Serimónia ne’e kulmina prosesu ida-ne’ebé dura besik fulan rua, hodi rekoñese exelénsia artístika no papél vital arte públika nian hanesan katalizadór ba transformasaun sosiál.

Manan na’in ba konkursu “Hari’i Pás liu husi arte publika” mak hanesan:

1º Lugar ($1.500): Munisípiu Díli
(Artista sira: Nélio Eusébio de Fátima Baptista, Nomerio F. S. Santos Correia, Raimundo Faustino no Avelino Lourenço Pires)

2º Lugar ($1.000): Munisípiu Liquiça
(Artista sira: Romualdo dos Santos da Silva, Higino Martins da Silva, Jeremias Duarte Bano, no David Sousa Ramalho)

3º Lugar ($800): Munisípiu Manufahi (Artista sira: Riqui Ricardo L. de Jesus, Luís Gonzaga da Silva Fernandes, Rovaldo Francisco de Jesus Ximenes no Angelino da Costa M. Pereira)

4º Lugar ($600): Munisípiu Lautém
(Artista sira: Alfionito de Mardino Freitas, Zelindo Fernandes, César Augusto Soares Lourdes, Renato Paunu Z. de Oliveira Isaac no Izaias A. Ego Titi Lopes)

Eventu ne’e hatudu mós projesaun dokumentáriu Harii Pás liuhusi Arte Públika, ne’ebé produz hosi SMNews, no espozisaun fotográfia ne’ebé produz hosi Prezidénsia Repúblika liuhosi Servisu Komunikasaun Sosiál, ne’ebé hatudu obra arte sira.

Inisiativa ida-ne’e reforsa Timor-Leste nia imajen nu’udar nasaun kriativu, komprometidu kle’an ho valór fundamentál ASEAN nian no aproveita kultura nu’udar pilar ba identidade nasionál no harii pás.

Jornalista : Hortencio Sanchez

Editór       : Cancio Ximenes