SYDNEY, 12 Dezembru 2025 (TATOLI)- Ajénsia Notísioza Timor-Leste – TATOLI, I.P. no Australian Broadcasting and Communications for International Development (ABCID), sesta ne’e, asina akordu parseria estratéjika iha serimónia ofisiál ne’ebé hala’o iha Sede Sentral ABCID, Sydney-Austrália.
Akordu ne’e asina direta husi Prezidente Konsellu Diretivu TATOLI, I.P, Noémio Falção no Xefe Ezekutivu ABCID, Claire Gorman.
Serimónia ida-ne’e marka sinál klaru kona-bá kompromisu komún atu hamutuk hadi’a kapasidade komunikasaun, troka informasaun, no dezenvolve projétu kooperasaun mediátika ba tempu oin.
Parte rua konsidera akordu ne’e importante tebes iha promosaun jornalizmu profisionál, troka esperiénsia téknika, no asesu ba formasaun atu fó reforsu ba setór mídia iha Timor-Leste. Ho akordu ne’e ABCID prontu atu apoiu inisiativa dezenvolvimentu média hodi aumenta padraun profisionál no fortalese relasaun komunikasaun rejionál.
Akordu ne’e sei fó oportunidade ba TATOLI atu hetan esperiénsia internasionál, inklui formasaun, kapasitasaun ba jornalista, produsaun kontéudu konjunta, no programa troka konesimentu atu aumenta kualidade servisu notísia.
Serimónia asinan akordu remata ho vizita ba sala produsaun ABCID, hodi haree diretu maneira operasaun, teknolojia, no métodu jestaun newsroom ne’ebé ABCID aplika iha kontinuidade.
Hafoin asina akordu, Prezidente TATOLI, I.P, sublina katak, parseria ne’e sei sai valór tan iha ezersísiu jornalismu independente no responsavel ba Timor-Leste.
“Ho asina akordu ida-ne’e, TATOLI, I.P. no ABCID sei kontinua hamutuk atu fó kontribuisaun ba fortalese mídia livre, promosaun transparénsia, no dezenvolvimentu komunikasaun públiku iha Timor-Leste no rejiaun”, katak Prezidente TATOLI, I.P, Noémio Falçao.
Durante iha Austália, Prezidente Konsellu Diretivu partisipa iha Programa Lideransa Media Ásia-Pasífiku ne’ebé hala’o iha Sydney. Programa ne’e inisiativa husi ABCID, servisu hamutuk ho Universidade New South Wales (UNSW).
Programa Lideransa Media Ásia-Pasífiku fó oportunidade ba lideransa media sira husi rejiaun atu hamoris kapasidade iha jestaun, inovasaun, étika jornalístika no dezenvolvimentu institusional.
TATOLI
