DILI, 14 Dezembru 2025 (TATOLI)—Timor-Leste, domingu ne’e, selebra Loron Nasionál Tais ho tema “Ho Tais, Hametin Ita-nia Identidade Nasionál”, tanba tais hanesan patrimóniu kulturál intanjível dahuluk ne’ebé hetan rekoñesementu husi UNESCO.
Notísia Relevante:
“Ita selebra ho orgullu no respeitu kle’an ita-nia Loron Nasionál Tais, ita-nia nasaun nia Patrimóniu Kulturál intanjível dahuluk ne’ebé hetan rekoñesimentu husi UNESCO. Ita fó onra la’ós de’it ba nia textil, maibé esénsia rasik husi ita-nia identidade nasionál,” Prezidente Repúblika, José Ramos-Horta, hateten hateten iha Palásiu Prezidensiál Nicolau Lobato, Bairru Pite.
Xefe estadu ne’e dehan, tema ba tinan ida-ne’e bolu sidadaun ida-idak atu reflete, valoriza, no no promove ativamente espíritu kulturál úniku ne’ebé define ita nu’udar timoroan.
Kada motivu no kombinasaun kór ida-idak, espesífiku ba kada munisípiu sira, ko’alia linguajen ida-ne’ebé nonook maibé forte kona-ba pertense.
Padraun úniku sira-ne’e reflete karakterístika husi komunidade oioin enkuantu kesi timoroan hamutuk nu’udar nasaun ida de’it.
Iha mundu ne’ebé muda lalais ho influénsia globál ne’ebé maka’as, Timor-Leste nia Tais hamriik nu’udar pilar ida-ne’ebé la nakdoko ba identidade timoroan nian.
“Ida-ne’e fó hanoin mai ita katak ita-nia forsa iha ita-nia unidade, hanesan kabas ida-ne’ebé soru hamutuk hodi kria tais ida-ne’ebé metin liu duké kabas ida de’it,” Ramos-Horta tenik.
Atu hametin Timor-Leste nia identidade nasionál mak fó onra ativamente ba patrimóniu ida-ne’e.
“Mai ita hatais ita-nia Tais ho orgullu, la’ós de’it iha okaziaun espesiál sira, maibé iha ita-nia moris loro-loron no reprezentasaun ofisiál sira. Mai ita apoia ita-nia mestre soru-na’in sira, guardiañu sira ba koñesementu antigu ida-ne’e, no asegura katak arte sagradu ida-ne’e sei kontinua ba jerasaun sira iha futuru,” nia hateten.
Iha Loron Nasionál Tais ida-ne’e, lori espíritu Tais nian iha ema hotu nia fuan, espíritu reziliénsia, beleza no orgullu kulturál ne’ebé labele naksobu.
“Hamutuk, hodi fó onra ba ita-nia Tais, ita hametin ita-nia nasaun nia fundasaun. Ksolok Loron Nasionál Tais mai ita hotu! Maromak haraik bensaun ba ita-nia soru-na’in sira. Maromak haraik bensaun ba ita-nia patrimóniu kulturál. No Maromak haraik bensaun ba Timor-Leste,” nia dehan.
Jornalista : Hortencio Sanchez
Editór : Cancio Ximenes
