Antoninho Ximenes eleitu nu’udár Prezidente AFTL períodu 2025-2029
DILI, 15 Dezembru 2025 (TATOLI)—Antoninho Junior Guterres Ximenes eleitu nu’udár Prezidente Ezekutivu Asosiasaun Futsál Timor-Leste (AFTL) ba períodu 2025-2029 liuhusi II kongresu ne’ebé realiza iha Salaun Xanana Sport, Bairros dos Grilos, Domingu (14/12/2025).
Iha II Kongresu AFTL referidu, kongresista sira eleje direitu hodi hili pakote estrutura ezekutivu kompostu Prezidente AFTL, Antoninho Ximenes, Vise Prezidente, Borja Loedaci Cauthe, hamutuk ho membru ezekutivu feto lideradu husi Nurima Ribeiro Alkatiri, membru ezekutivu mane, Levi Guterres no Pedro dos Santos.
“Ha’u-nia parabéns ba estrutura eleita AFTL. Ha’u hato’o obrigadu mós ba estrutura anteriór ba kontribuisaun hotu ne’ebé imi fó ona ba dezenvolvimentu futsál iha ita-nia rai,” Prezidente Federasaun Futeból Timor-Leste (FFTL), Nilton Gusmão hateten liuhusi komunikadu imprensa ne’ebé Tatoli asesu, Segunda ne’e.
Nilton Gusmão relata katak ho kolaborasaun entidade hotu ne’ebé iha espíritu serbisu hamutuk, sei kontinua fó kontribuisaun ba futsál ida-ne’ebé atrativu no kompetitivu, tantu rai-laran, rejionál no internasionál.
Prosesu realizasaun II Kongresu AFTL hodi hili strutura Órgaun Ezekutivu Asosiasaun Futsál Timor-Leste (AFTL) ba períodu 2025-2029, prezensa husi membru fundadór sira hamutuk na’in-hitu, delegadu husi klube 20 no membru Órgaun Ezekutivu FFTL, Domingos Caeiro, Sekretáriu Jerál FFTL, José Adilson Ribeiro no konvidadu sira.
Entretantu, estrutura anteriór AFTL lideradu husi atuál Komandante Jerál Polísia Nasionál Timor-Leste (PNTL), Komisáriu Polísia Henrique da Costa no Vise Prezidente Ivan Alves ba mandatu 2020-2025.
Jornalista: Natalino Belo
Editór: Xisto Freitas da Piedade
