Atleta Karate-do na’in-hitu falla rekolla medalla iha SEA Games
DILI, 15 Dezembru 2025 (TATOLI)—Atleta na’in-hitu husi modalidade Karate-do falla rekolla medalla ba Timor-Leste iha eventu kompetisaun desportu SEA Games 2025 iha Tailándia.
Atleta Karate-do na’in-hitu referidu kompete iha kategoria númeru ne’ebé diferente kompostu mane na’in-haat no feto na’in-tolu ne’ebé maioria elemidadu iha faze quarterfinals hanesan atleta mane Tan da Costa Oko kategoria kilógrama 58 ne’ebé derrota ho altleta husi Vietname, Duc Chu Van ho skor 0-10.
Tolu seluk, Júlio da Silva Quefi kategoria kilógrama 60 derrota ho altleta husi Malázia Geerijaeswaran ho skor 1-6, Bartolomeu Lay kategoria kilógrama 67 derrota ho skor 8-0 bainhira kompete ho atleta husi Malázia Sureeya Sankar, Imanuel Costa kilógrama 55 derrota ho atleta husi Tailándia ho skor 0-2 no Deonísio Quefi derrota ho atleta husi Indonézia, Ignatius Kandou ho skor 7-1 kategoria kilógrama 71.
Husi atleta klase feto, Maria Reis iha kategoria kilógrama 55 derrota ho atleta husi Laos, Manyvanh Sysoubanthong ho skor 0-2, Libánia Freitas kategoria kilógrama 61 lakon ho skor 0-8 bainhira kompete ho atleta husi Vietname, Thi Tam Hoang.
Enkuantu, atleta Idália Marques kategoria kilógrama 50 derrota ho skor 3-13 bainhira kompete ho atleta husi Filipina, Marie Adriano ne’ebé hadau medalla bronze kategoria Repechage B.
Kompetisaun modalidade Karate-do rasik realiza durante loron-haat 11-14 Dezembru iha Multi-Purpose Space Ratthaprasasanphakdi Building Govermment Complex Chaeng Watthana, Bang, Tailándia.
Jornalista: Natalino Belo
Editór: Xisto Freitas da Piedade
