BOBONARU, 15 Dezembru 2025 (TATOLI) – Inspetór no auditór Funsaun Públika iha Bobonaru hala’o enkontru trimestrál ida ne’ebé foka ba hametin kolaborasaun no hasa’e kompeténsia inspetór no auditór sira iha instituisaun públika, liuhusi formasaun espesializada.
Prezidente Munisípiu Bobonaru, Paulo Moniz Maia, ne’ebé reprezenta Ministru Komersiu no Indústria subliña katak enkontru rutina ne’e la’ós ho intensaun atu fó kulpa ba malu, maibé sai fórum ba input hodi hasa’e kualidade atendimentu públiku ho responsabilidade, transparénsia, no akuntabilidade.
Nia dehan prinsípiu governasaun di’ak tenke implementa ho inkluzivu no tuir enkuadramentu legál ne’ebé aplikavel hodi kontinua hasa’e konfiansa públiku ba instituisaun Governu nian.
“Enkontru ne’e hein atu hamosu pensamentu krítiku, identifika lakuna sira no dezafiu sira, no hasa’e ami-nia integridade hanesan autoridade ida iha sentru dezenvolvimentu sosiál no ekonómiku nian iha munisípiu”, nia hatete iha iha salaun Maria Tapó.
Komisáriu ba Asuntu Protokolu Disiplinár iha Komisaun Funsaun Públika, Agapito da Conceição, esplika katak mekanizmu auditoria iha kada ministériu la hanesan. Tanba ne’e, enkontru ne’e hein atu identifika área sira ba kolaborasaun ne’ebé efetivu entre fiskalizadór no auditór sira.
“Ami presiza fahe esperiénsia sira hodi hala’o knaar sira husi trimestre dahuluk to’o dahaat no formula pasu konkretu sira hodi rezolve dezafiu sira iha terrenu, inklui liuhusi formasaun”, nia hateten.
Agapito mós subliña importánsia atu enkoraja dezenvolvimentu karreira inspetór no auditór sira, liuhusi koordenasaun ho Komisaun Funsaun Públika no Inspesaun-Jerál Estadu hodi garante governasaun di’ak no minimiza prátika sira ne’ebé la tuir lei.
Iha biban hanesan, Inspetór-Jerál Estadu, Francisco de Carvalho, subliña katak enkontru ne’e ho objetivu atu otimiza papél inspetór no auditór sira-nian liuhusi dezenvolvimentu kompeténsia bazeia ba formasaun espesializada.
“Inspetór sira tenke komprende karakterístika sira no prosedimentu sira serbisu nian husi instituisaun idaidak tanba idaidak iha sistema ne’ebé diferente. Ita-nia serbisu la’ós buka sala, maibé liuliu fó konsellu nune’e serbisu hala’o tuir regra no prosedimentu sira”, nia deklara.
Enkontru ne’e atu hametin sinerjia entre inspetór no auditór sira no enkoraja hadi’a kualidade fiskalizasaun hodi realiza meta instituisaun públika sira ho integridade no profisionalizmu.
Jornalista: Sergio da Cruz
Editora: Maria Auxiliadora
