Embaixadór Japaun Kimura Tetsuya hala’o enkontru despedida ho Xefe Estadu

DILI, 15 Dezembru 2025 (TATOLI)—Embaixadór Japaun iha Timor-Leste, Kimura Tetsuya,  realiza enkontru ikus ho Prezidente Repúblika José Ramos-Horta tanba mandatu termina ona no tempu besik sei fila hikas ba Japaun.

Durante enkontru, Embaixadór Kimura espresa ninia apresiasaun sinsera ba Xefe Estadu ba ninia orientasaun no apoiu e’ebé nia simu durante ninia mandatu, subliña karáter períodu produtivu  no fortalesimentu iha relasaun diplomátika entre Timor-Leste no Japaun.

“Ne’e enkontru despedida, maibé iha enkontru ha’u ho Prezidente ko’alia mós kona-ba projetu boot sira-ne’ebé la’o hela hanesan konstrusaun Ospitál iha Hospitál Nasionál Guido Valadares Dili, projetu boot kona-ba fabrika ró iha Manatuto no seluk tan, Japaun prontu nafatin apoiu Timor-Leste nia dezenvolvimentu,” Embaxadór ne’e hateten ba jornalista sira iha Palásiu Prezidensiál Nicolau Lobato, Bairru Pite, ohin.

Iha okaziaun ne’e, Embaixadór Kimura atualiza mós ba Prezidente kona-ba konstrusaun terminál pasajeiru foun iha Aeroportu Internasionál Nicolau Lobato, ne’ebé ajenda atu hahú iha tinan oin, nune’e mós melloramentu fasilidade sira hotu ne’ebé Japaun apoia.

Nia mós destaka progresu husi inisiativa signifikativu rua setór privadu nian ne’ebé envolve konstrusaun ró no dezenvolvimentu Sentrál Elétrika Mega Solár.

PrezidenteRepúblika, José Ramos-Horta espresa ninia satisfasaun ho avansu inisiativa eskala boot sira-ne’e no agradese Embaixadór Kimura ba ninia empeñu, dedikasaun no kontribuisaun iha kooperasaun bilaterál ne’ebé kle’an.

Xefe Estadu ne’e rekoñese progresu signifikativu ne’ebé alkansa durante Embaixadór nia mandatu no reafirma kompromisu Timor-Leste nian atu hametin liután lasu bilaterál no kooperasaun entre Timor-Leste no Japaun iha futuru.

Jornalista : Hortencio Sanchez

Editór       : Cancio Ximenes