ÐILI, 15 Dezembru 2025 (TATOLI)–Jurista Avelino Coelho da Silva husu ba Estudante Univeritáriu Timor-Leste (EUTL) atu pasiénsia hein Tribunál nia rezultadu fiskalizasaun abtrata ba revogasaun Lei Pensaun Mensál Vitalísia (LPMV).
Nia dehan, Timor-Leste nu’udar Estadu direitu demokrátiku, tanba ne’e sosiedade no estudante husu Parlamentu hodi halo revogasaun ba LPMV.
“Ha’u rona Prevedoria Direitu Umanu no Justisa mak husu. Agora Tribunál nia desizaun ne’e oinsá, ne’e depende ba desizaun Tribunál,” Avelino hateten ba Jornalista sira iha Asosiasaun HAK, Farol, Segunda ne’e.
Tuir andamentu prosesuál katak Prezidente Repúblika atu husu fiskalizaun ba lei ida-ne’e tenke molok loron-30, hahú husi lei ne’e nia aprovasaun, agora atu tesi ne’e tenke mai husi Tribunál tanba ne’e prosesuál ona.
“Sa Parlamentu manda lei ida ba Prezidente, iha loron 30 atu ko’alia, públika ka atu husu fiskalizasaun ka atu fó fila ka lori ida-ne’e ba Tribunál. Tanba ne’e iha prosesuál, depende sira atu haree. Ita haree kazu barak mak seidauk tesi. Prontu depende ba prosesuál iha Tribunál,” nia katak.
Notísia relevante : Fiskalizasaun Lei Pensaun Vitalísia iha hela prosesu judisiál
Tuir Avelino, karik Tribunál deside inkonstitusionál ka konstitusionál ba revogasaun LPMV, ne’e depende ba Tribunál.
“Tribunál tesi lian tuir nia konsiénsia, ita tenke respeita, ida-ne’e dehan Estadu direitu demokrátiku. Agora prosesu iha ona Tribunál agora ita hein, Tribunál tesi lian oinsá,” nia katak.
Jornalista : Natalino Costa
Editora : Julia Chatarina
