VIKEKE, 15 Dezembru 2025 (TATOLI)—Diretór Sentru Solidariedade Sosiál Munisípiu Vikeke, Geraldo de Carbalho, infoma Ministériu Solidariedade Sosiál Inkluzaun (MSSI) apoia pakote komplementáriu ba família vulneralvel no ema ho defisiénsia sira iha Munisípiu Vikeke.
“Foin falais ne’e (13 Dezembru) ami hamutuk ho Ministra Solidariedade Sosiál no Inkluzaun (MSSI) apoia pakote komplementáriu ba ita-nia família vulneravel, ema ho defisiénsia no eroi vivu sira husi postu Uatukarbau no Uatulari. Husi apoia ne’e atu ajuda ita-nia família vulneralvel sira hodi aguenta konsume nesesidade loron-loron nian,” Geraldo de Carvalho ba TATOLI iha Postu Vikeke Vila, Segunda ne’e.
Geraldo subliña apoia pakote komplementáriu ne’e bazeia ba pedidu husi autoridade suku sira-ne’ebé hato’o direta ba MSSI nasionál, tanba ne’e ekipa nasionál lori pakote komplementáriu mai Vikeke hodi distribui ba benefisiáriu sira.
“Apoia ne’e ita-nia xefe suku sira mak haruka sira-nia pedidu ba nasionál, depoiz ami-nia tékniku sira bá halo verifikasaun ba benefisiáriu sira katak ema ne’e merese simu ai-han. Tan ne’e mak ami bá apoiu ai-han ba família vulneravel sira no apoia ne’e la haree ba rasa, kór no partidu tanba povu ne’e ita hotu nian,” nia akresenta.
Nia relata katak ai-han komplementáriu ne’ebé MSSI distribui ba benefisiáriu kompostu husi foos, mina, supermie, dose no seluk tan.
Tuir dadus, família benefisiáriu husi postu rua hanesan Uatukarbau suku rua, Suku Irabin de Baixo no Suku Loiulu, ho totál benefisiáriu hamutuk 100. Enkuantu, Postu Uatulari suku haat kompostu husi Suku Vessoru totál benefisiáriu 25, Suku Babulu ho totál benefisiáriu 16, Suku Afaloikai ho totál benefisiáriu 100 , Suku Matahoi ho totál benefisiáriu 100.
Iha fatin ketak, Xefe Suku Irabin de Baixo, Postu Uatukarbau, Munisípiu Vikeke, José Baptista do Carmo, hateten, kona-ba apoiu ai-han komplementáriu ne’ebé Governu liuhusi MSSI apoia ba família vulneravel sira-ne’e parte ida bele tulun ona sira ba loron rua ka tolu.
“Ha’u sente apoia ne’e bele tulun ona ita-nia família vulneravel, maibé apoia ne’e aguenta ba loron ida ka rua nian. Aleinde ne’e, ha’u hakarak sujere karik apoia ba mós idozu sira atu sira mós hetan nesesidade báziku sira-ne’e,” nia hato’o.
Jornalista: Vitorino Lopes da Costa
Editór: Xisto Freitas da Piedade
