Sentru Ratahu hahú prodús karau susubeen
VIKEKE, 15 Dezembru 2025 (TATOLI)—Koordenadór Sentru Ratahu, Suku Uma-Ua’in Kraik, Postu Vikeke Vila, Munisípiu Vikeke, Agostinho C. Soares, informa Ministériu Agrikultura, Peska, Pekuária no Floresta (MAPPF) hahú halo programa produsaun ba karau Timor nia susubeen iha Sentru Ratahu.
“Iha Sentru Ratahu ne’e ita iha karau Timur hamutuk 11, kompostu husi inan sanulu (10) no karau aman ida (1). Daudaun ne’e karau Timor inan rua mak hahoris ona oan, ne’ebé ita hahú hois karau inan rua nia susubeen, maibé ida-ne’e projetu pilotu ne’ebé seidauk atinje ita-nia meta,” Agostinho C. Soares ba TATOLI iha Postu Vikeke, Segunda ne’e.
Agostinho hatutan, produsaun karau susubeen foin ba dahaat, hois dahuluk hetan susubeen hamutuk 420 ml, hois daruak 600 ml, datoluk hois 700 ml no dahaat hois 200 ml.
“Ami hois ba dahaat ne’e karau susubeen kuantidade tun ba 200 ml tanba iha tempu udan nune’e konsentradu susar. Maibé, agora daudaun karau susubeen sa’e fali bá 600 ml. Atu hois karau susubeen ne’e tuir klima (udan). Kuandu udan ami labele hois. Ami hois ne’e bainhira udan para,” nia esplika.
Agostinho haktuir karau susubeen ne’ebé rekolla daudaun ne’e sei rai iha jeleira laran, seidauk prodús ba produtu seluk, maibé kuandu prodús bá produtu seluk tenke hetan orientasaun husi nasionál.
Nia informa Sentru Ratahu daudaun ne’e kontinua kuda ai-han ba karau sira-ne’ebé haki’ak iha sentru ne’e hodi fornese karau susubeen.
“Ami kuda ai-han animál nian hanesan batar kinur, batar mutin no batar kay rala,” nia hato’o.
Entretantu, traballadór ne’ebé servisu iha Sentru Ratahu hamutuk na’in-17 hodi tau-matan ba karau sira iha sentru referidu.
Jornalista: Vitorino Lopes da Costa
Editór: Xisto Freitas da Piedade
