KOVALIMA, 15 Dezembru 2025 (TATOLI) – Servisu Munisipál Água Saneamentu no Ambiente (SMASA), sei halo reabilitasaun tanke rezervatóriu ne’ebé lokaliza, iha Suku Lepo, postu administrativu Zumalai, Munisípiu Kovalima.
Diretór Servisu munisipál Água Saniamentu no Ambiente (SMASA), Angelino Henrique, dehan SMASA hetan projetu ida atu halo reabilitasaun tanke rezervatóriu, ho razaun tanke rezervatóriu ne’e la funsiona tanba impaktu husi dezastre naturál.
“Iha 2026, ita hetan projetu ida de’it projetu reabilitasaun tanke rezervatóriu iha suku Lepo ho sistema gravitasaun komunidade ne’e sei benefisia husi suku haat maka sei asesu bee-moos”, Angelino Henrique, informa ba TATOLI, iha Bairru Costa, Ohin.
Razaun SMASA tau iha planu hodi halo reabilitasaun tanke rezervatóriu tanba tanke la funsiona hetan estragu husi dezastre naturál hanesan rai halai ,ai monu halo kanu sira tohar.
Dirijente ne’e esplika katak atu halo reabilitasaun sistema bee moos iha postu administrativu Zumalai, Suai ho Tilomar sei tau iha planu orsamentu Jerál Estadu 2027,tanba iha 2026 SMASA hetan de’it projetu ida.
Prosesu reabilitasaun tanke rezervatóriu ne’e liuhusi prosesu konkursu públiku ne’ebé sei hahú iha Janeiru 2026 bainhira empreza ne’ebé maka manan iha konkursu públiku maka sei halo reabilitasaun ba tanke rezervatóriu.
SMASA reabilita tanke rezervatóriu ne’e prevee ona iha Orsamentu Jerál Estadu 2026 ho montante hamutuk rihun $32 ne’ebé komunidade husi suku Lepo, Zulo no Fatuleto husi postu administrativu Zumalai sai benefisiáriu.
Durante halo monitorizasaun sistema bee-moos iha postu administrativu sira, SMASA nota katak sistema bee-moos iha postu administrativu Zumalai, Tilomar ho Suai hasoru problema, nune’e SMASA sei tau iha planu OJE 2027 atu halo reabilitasaun sistema bee-moos ne’ebe maka hetan estragu ne’e .
“ Ita halo monitorizasaun sistema bee-moos iha postu administrativu, ami nota sistema bee-moos iha postu Administrativu Zumalai, Tilomar ho Suai maka hasoru problema boot tanba sistema barak maka hetan estragu. Nune’e ami sei tau iha planu atu halo reabilitasaun iha Orsamentu Jerál Estadu 2027 ”, nia promete.
Jornalista: Celestina Teles
Editór:Florencio Miranda Ximenes
