DILI, 16 Dezembru 2025 (TATOLI)—Asidente tráfegu iha área Waisá, Aldeia Ossoua, Suku Tirilolo, Postu Administrativu Baukau Vila, Tersa ne’e, rezulta ema na’in-tolu lakon vida.
Asidente ne’e akontese purvolta tuku 01:30 Otl iha-ne’ebé kareta kamioneta ho xapa matríkula A. 56.916 husi diresaun Postu Administrativu Ossu, Munisípiu Vikeke bá Dili ne’ebé suspeita kareta referida derepente laiha travaun.
Xefe Aldeia Ossoua, Estevão Alfredo Belo, esplika asidente referida tuir informasaun husi kondutór katak hafoin utrapasa ho kareta seluk, akontese travaun laiha nune’e mosu asidente iha kruzamentu iha rai-lolon ne’ebá.
“Pasajeiru mesak família fetosaa no umane ne’ebé atu ba tuir seremónia graduasaun iha Dili,” Xefe Aldeia Ossoua informa ba TATOLI liuhusi telefónema, Tersa ne’e.
Vítima na’in-tolu ne’ebé lakon vida kompostu mane-rua no feto-ida ne’ebé hakotu iis iha lokál asidente, enkuantu ema na’in-rununulu (20) resin mak hetan kanek kamaan no grave.
Estevão Belo relata vítima sira-ne’e maihusi Suku Nahareka, Postu Administrativu Ossu, Munisípiu Vikeke, iha-ne’ebé bainhira akontesimentu ne’e akontese hetan apoiu diretamente kedas husi komunidade ne’ebé hela besik iha lokál asidente.
Entretantu, hafoin akontesimentu, vítima sira evakuadu kedas Ospitál Rejionál Eduardo Ximenes (HoREX-sigla portugeza) Baukau.
Jornalista: Natalino Belo
Editór: Xisto Freitas da Piedade
