OEKUSI, 16 Dezembru 2025 (TATOLI) – Hafoin benefísia ekipamentu informátiku no mobiliáriu, Autoridade Protesaun Sívil (APC) Oekusi hetan tan eskritóriu ida husi autoridade.
Autoridade Rejiaun Administrativa Espesiál Oekusi Ambeno (RAEOA), lideradu Prezidente Autoridade, Régio da Cruz Salu, ofisialmente atribui, temporariamente, eskritóriu uma Estadu ida ba Autoridade Protesaun Sívil (APC) Oekusi hodi hala’o serbisu Estadu atu atende nesesidade povu Atoni nian.
Observasaun Jornalista Ajénsia Tatoli,I.P, molok entrega Prezidente Autoridade RAEOA akompaña hosi Diretór Diresaun Rejionál Terra no Propriedade Oekusi, José Ase Neno Colo, konvida Sekretáriu Estadu Protesaun Sívil (SEPS) observa uluk fatin ne’ebé lokaliza iha bairru Palaban besik Eskola Bázika Sentrál (EBC) 01 de Maio.
Notísia relevante:SEPS husu Autoridade apoia rai konstrui eskritóriu Protesaun Sívil iha Oé-Cusse
Iha ámbitu ne’e, Diretór Diresaun Rejionál Terra no Propriedade Oekusi, José Ase Neno Colo, esplika katak, eskritóriu ne’ebé oferese nu’udar uma Estadu, durante ne’e husik hela, nune’e autoridade RAEOA atribui temporariamente ba APC atu bele hadi’a no utiliza nu’udar edifísiu atu hala’o serbisu Estadu nian iha Oekusi.
“Ita oferese fatin ne’e, tanba durante ne’e sira laiha edifísiu atu hala’o sira-nia serbisu iha Oekusi, tanba edifísiu ne’ebé iha, sira hamutuk de’it bombeiru sira, entaun ohin ita entrega temporariamente atu hala’o sira-nia serbisu, tanba rai, autoridade sesante atribui ona kuaze ektare iha iha suku Lalisuk área Sikone, ba futuru bele konstrui sira-nia edifísiu permanente, maibé agora sira bele utiliza temporariamente uma ne’e ho rai atu hala’o serbisu ho di’ak,” nia hateten hafoin entrega ne’ebé akompaña direita husi PA RAEOA, ohin.
Notísia relevante:SEPS apoia ekipamentu informátiku no mobiliáriu haforsa serbisu APC Oekusi
Iha biban ne’e, Sekretáariu Estadu Protesaun Sívil, Domingos Mariano dos Reis, reprezenta funsionáriu APC RAEOA hato’o agradesimentu ba Autoridade RAEOA tanba bele oferese fatin ida ba protesaun Sívil, atu hala’o serbisu hodi atende nesesidade povu iha Oekusi.
“Ohin ami simu, maske edifisíu ki’ik hela, maibé agradese tanba Autoridade RAEOA iha vontade ba APC bele serbisu hamutuk, tanba ne’e edifísiu ki’ik maibé iha rai sei iha espasu, entaun ita bele halo buat ruma, entaun iha tempu-badak ita orienta ona tékniku sira husi APC mai halo ona levantamentu ba fatin ne’e, saida mak ita halo iha tinan oin,” nia orgullu.
Jornalista: Abílio Elo Nini
Editór: Rafael Ximenes de A. Belo
