Empreza Star King hahú nahe alkatraun faze dahuluk ba estrada Batugade
BOBONARU, 16 Dezembru 2025 (TATOLI)—Empreza Star King Construction, Lda, hahú nahe alkatraun faze dahuluk nian ba pakote dahuluk reabilitasaun estrada diresaun Batugade, Postu Administrativu Balibo, Munisípiu Bobonaru.
Prosesa nahe alkatraun ne’e akompaña direta husi Xefe Koordenadór Nasionál Laboratóriu Enjinária Sivíl, Jony Rodrigues Varelano no ekipa téknika sira hodi haree no orienta lala’ok servisu iha terrenu ho di’ak.
Xefe Koordenadór Nasionál Laboratóriu Enjinária Sivíl, Jony Rodrigues Varela, hateten ohin loron sira mai halo observasaun nahe alkatraun ba pakote dahuluk reabilitasaun estrada Batugade ho distánsia kilómetru ualu (8) no husi kilómetru ne’e iha kilómetru haat (4) mak ninia kamada fundasaun base course ne’e ramata ona hodi kontinua nahe alkatraun faze dahuluk nian.
“Materiál sira-ne’ebé uza hodi halo ba konstrusaun refere halo ona teste iha laboratóriu nasionál MOP nian, hodi halo obra ne’e bele kualidade. Tanba ne’e, husi laboratóriu atu halo kontrola kualidade obra ida-ne’e ami destaka ekipa téknika ema na’in-rua hodi tau matan ba servisu ida-ne’e,” Jony Rodrigues Varela informa ba jornalista sira iha Batugade, ohin.
Nia fiar katak projetu ida-ne’e bele aselera lalais maske sira mós hasoru difikuldade ba klimátika udan nian, maibé enpreza kuaze halo ona progresu lubuk ida tanba agora bele iha ona prosesu nahe alkatraun, entaun kontratu tinan ida sira bele finaliza ho lalais.
Iha fatin hanesanm tuir Enjineiru empreza Star King Construction, Lda, Rivaldo Borges Pereira, hateten prosesu nahe alkatraun ba faze dahuluk sira-nia alvu atinje metru 60-resin kompostu husi estrada kilómetru haat (4) nian.
“Ami nahe uluk alkatraun ba estrada kilómetru rua (2) ne’e bele finaliza antes loron natál, nune’e molok tama iha fulan-Janeiru, ami bele kompleta kilómetru rua (2) hodi finaliza nahe alkatraun to’o estrada kilómetru haat (4),” nia informa.
Tanba ne’e, nia dehan, prosesu nahe alkatraun ba ohin loron nian iha kamioneta 15 mak tula materiál alkatraun husi Kaitehu-Likisa mai fakar iha Batugade, no husi kamioneta sira-ne’e balun bele tula dala rua (ret 2) atu bele kompleta to’o ret 21 ba ohin loron nian.
“Projetu ne’e fiar katak bele finaliza lalais, maske daudaun ne’e tempu udan maibé ladun ho intensidade ne’ebé maka’as. Karik servisu hela mak udan mai, entaun ita sei para tanba se lae bele estraga alkatraun”, nia hateten.
Enkuantu projetu ne’e iha pakote rua, dahuluk responsabliza husi empreza King Construction, Lda, ho kustu $3,439,179.37 no pakote daruak husi empreza Tomobest Trading Unipesoál, Lda, ho kustu $4,401,638.09, no projetu ne’e sei hala’o ho durasaun kontratu tinan ida.
Jornalista : Alexandra da Costa
Editór : Cancio Ximenes
