DILI, 16 Dezembru 2025 (TATOLI)—Governu Austrália iha Timor-Leste, Tersa ne’e, oferese rede internet STARLINK ba Institutu Nasionál Formasaun Dosente no Profisionál Edukasaun (INFORDEPE), hodi hasa’e kualidade formasaun inovativa teknolojia ba profesór sira iha nasionál no munisipál sira.
“Ami kontente tanba INFORDEPE mós asesu ona internet STARLINK hodi submete servisu. Ami fiar katak ida-ne’e ne’e sei apoia instituisaun nia operasaun loroloron nian hodi fornese servisu ho kualidade tanba ita-nia kompromisu atu hametin setór edukasaun Timor-Leste hodi reflete ita-nia komprensaun koletiva, katak edukasaun mak fundasaun ba dezenvolvimentu sustentavel no garante katak estudante bele alkansa sira-nia potensiál tomak,” Reprezentante Embaixada Austrália, Lisa Hannigan, dehan nia diskursu iha salaun INFORDEPE, Balide.
Lisa hateten ho STARLINK ne’e garante katak bele muda matadalan ne’ebé iha valór no prátiku ba INFORDEPE nia servisu, pratikamente iha parseira ho parseiru dezenvolvimentu sira. Tanba INFORDEPE hala’o papél ne’ebe krítiku tebes hodi ba informasaun no kapasitasaun iha setór edukasaun.
Iha fatin hanesan, Ministra Edukasaun (ME), Dulce de Jesus Soares, informa liuhusi apoiu ne’e garante oportunidade dezenvolvimentu profisionál ne’ebé ekitavel ba manorin sira hotu iha nasaun tomak, mak aprendizajen dijitál no asesu ba formasaun, apoiu no plataforma aprendizajen online.
“Tanba ne’e, ho haksolok tebes, mak ha’u hakarak destaka etapa importante daruak ne’ebé ita selebra ohin mak ativasaun STARLINK iha INFORDEPE. Ita presiza atu uza ferramenta dijitál, no ba ida-ne’e INFORDEPE presiza asesu internet neʼebé viavel,” ministra dehan.
Governante ne’e subliña formasaun ne’ebé INFORDEPE oferese tenke ekivalente ho padraun internasionál. Formadór sira labele de’it hanorin konteúdu maibé sira tenke iha oin liu kona-ba pedagojia moderna, instrusaun mentoria no deskobrimentu foun sira iha siénsia edukasaun nian.
“INFORDEPE tenke sai kanál ida-neʼebé liga ita-nia edukadór sira ba dezenvolvimentu profisionál di’akliu ne’ebé bele hetan hosi fonte internasionál no online hodi dezenvolve parseira xave no akredita modelu oioin hosi dezenvolvimentu profisionál kontínuu. Planu ne’e asegura katak INFORDEPE sai sentru eselénsia ida—fatin ida-ne’ebé oportunidade ba dezenvolvimentu profisionál hotu-hotu padronizadu, sertifika no relevante diretamente ba hadi’ak instrusaun iha saladeaula,” Dulce informa.
Entretantu, Prezidente INFORDEPE, Domingos Martins hateten lansamentu ohin ne’e útil ba INFORDEPE ba tinan oin mai.
“Rede STARLINK ne’ebé oferese hosi Governu Austrália atu suporta tebes ba área formasaun ne’ebé ita promove formasaun modalidade. Oferese STARLINK ne’e bele fasilita formasaun inovativa online. Importánsia balun hosi STARLINK mak halo armonizasaun formasaun, inovasaun teknolojia ne’ebé halo konsesaun di’ak ho munisipál sira,” Domingos akresenta.
Tuir nia katak rede STARLINK ne’e hanesan pasu ida-ne’ebé solusiona kona-ba oinsá mak fasilita formasaun inovativa teknolojia ne’e ba profesór sira.
Jornalista: Osória Marques
Editór: Xisto Freitas da Piedade
