MAE oferese formasaun ba tékniku PIDM Vikeke kona-ba preparasaun planu investimentu munisipál

VIKEKE, 16 Dezembru 2025 (TATOLI)—Ekipa Ministériu Administrasaun Estatál (MAE) liuhusi Diresaun Nasionál Apoia ba Implementasaun Planeamentu Dezenvolvimentu Integradu fasilita formasaun ba tékniku sira husi Diresaun Programa Integradu Dezenvolvimentu Munisipál (PIDM) Vikeke kona-ba  prosesu elaborasaun Planu Investimentu Munisipál no prosesu aprovizionamentu.

Iha abertura formasaun ne’e, reprezentante Diretór Nasionál Apoia ba Implementasaun Planeamentu Dezenvolvimentu Integradu, Cosme E. da Costa Saldanha, esplika objetivu prinsipál ba formasaun ne’e atu fó asisténsia téknika ba tékniku PDIM sira, atu mellora liután sira-nia koñesimentu ba elaborasaun planu investimentu sira iha Munisípiu Vikeke.

“Formasaun ne’e durante loron rua ho ninia fórma hanesan refresing training. Ami sente formasaun sira-ne’e importante atu fó hanoin filafali regra no prosedimentu sira-ne’ebé vigór iha PIDM nian,” Cosme E. da Costa Saldanha hateten iha salaun CNE, Postu Vikeke Vila, Tersa ne’e.

Cosme hatutan prosesu elaborasaun planu investimentu hahú husi nivel baze, entaun postu administrativu sira mós presiza iha koñesimentu ba prosesu hirak-ne’e.

Iha fatin hanesan, Prezidente Autoridade Munisípiu (PAM) Vikeke, Francisco C. S. de Gonzaga Soares, hateten liuhusi formasaun sira-ne’e hodi kontinua fó hanoin ba rekursu sira iha Munisípiu Vikeke liuliu preparasaun ba planu investimentu nian.

“Ha’u husu ba formandu sira aproveita oportunidade  sira-ne’e hodi komprende kle’an ba servisu sira,” nia hato’o.

Entretantu, abertura formasaun ne’e partisipa husi Diretór Servisu Munisipál sira, Administradór Postu, funsionáriu sira husi PIDM no funsionáriu sira husi postu administrativu lima.

Jornalista: Vitorino Lopes da Costa

Editór: Xisto Freitas da Piedade