VIKEKE, 16 Dezembru 2025 (TATOLI)—Sekretáriu Estadu Formasaun Profisionál no Empregu (SEFOPE) hamutuk ho Autoridade Munisípiu Vikeke, Tersa ne’e, atribui sertifikadu lian inglés ba formandu na’in-88 iha Munisípiu Vikeke.
Iha distribuisaun sertifikadu ne’e, reprezentante SEFOPE, Jacinto da Costa Soares haktuir distribuisaun sertifikadu ne’e ba etapa daruak ona.
“Ami distribui sertifikadu ba formandu hamutuk na’in-88 husi Munisípiu Vikeke. Formandu sira-ne’e iha tinan kotuk liubá la pasa iha teste traballadór ba Austrália nian. Nune’e, SEFOPE reliza fali formasaun ba ita-nia kandidatu sira hodi aprende lian inglés,” Jacinto da Costa Soares hateten iha distribuisaun sertifikadu, iha salaun Tera-Imi, Beloi, Vikeke.
Jacinto dehan, iha formasaun lian inglés, SEFOPE destaka formadór lian inglés hamutuk na’in-haat ba Munisípiu Vikeke hodi fasilita formasaun ba kandidatu traballadór sira.
Nia esplika, maski distribui ona sertifikadu ba formandu sira, maibé sei hein empregadór sira husi Austrália presiza foin bele dezloka, más sei liuhusi teste direta husi empregadór sira.
Iha fatin hanesan, Prezidente Autoridade Munisípiu (PAM) Vikeke, Francisco C. S. de Gonzaga Soares, enkoraja formandu sira katak aprende la haree ba idade, maibé filafali ba ema idak-idak ninia vontade aprende hanesan daudaun formandu sira aprende iha lian inglés.
“Ohin imi (formandu) simu ona sertifikadu, bá-oin kontinua aprende no labele moe ko’alia tanba lian inglés ne’e ema-nia lian. Se ita hetan tiha formasaun durante fulan tolu ne’e seidauk sufisiente, presiza aprende nafatin hodi hatene ema-nia lian,” nia enkoraja.
Iha distribuisaun sertifikadu ne’e, partisipa husi Diretór Serbisu Munisipál sira, reprezentante Polísia Nasionál Timor-Leste (PNTL) Munisípiu Vikeke, funsionáriu SEFOPE Vikeke no formandu na’in-88.
Jornalista: Vitorino Lopes da Costa
Editór: Xisto Freitas da Piedade
