OEKUSI, 16 Dezembru 2025 (TATOLI) – Polísia Nasionál Timor-Leste (PNTL) liuhusi Unidade Patrullamentu Fronteira (UPF) ho Tentara Nasionál Indonézia (TNI) komprometidu sei garante seguransa iha liña fronteira sira, hahú husi Oekusi, Bobonaro to’o Kovalima durante selebrasaun natál no tinan foun.
“Dentro natál no tinan foun ne’ebé atu mai, ha’u koordena ona ho komandante Satgas-Pamtas no komprometidu atu garante iha liña fronteira, komunidade sira mós tenke respeita lei nasaun idak-idak nian, ne’ebé mak vale, nune’e ita bele evita husi dezentendimentu sira-ne’ebé hamosu problema,” Komandante UPF Superentendente Polísia, Euclides Belo informa, iha Oekusi.
Autoridade seguransa fronteira ne’e, afirma, nu’udar seguransa iha liña fronteira bandu no proibidu, ba sidadaun ne’ebé tenta importa sasán liu-liu fugete tuir dalan ilegál, tanba lei bandu totál.
“Importasaun fugete ne’ebé iha, UPF nia kna’ar iha liña fronteira ami nafatin koordena, nune’e fugete sira hatama karik, presiza tuir dalan legál la’ós liu fali ilegál ne’e lei bandu, proibidu tebes. Ida-ne’e, kuandu ami haree sei prende, kuandu kolega TNI sira hetan, sei komunika ba malu, tanba ne’e mak husu ba komunidade hotu katak, karik presiza tenke iha lisensa no ho objetivu ne’ebé klaru,” nia apela.
Notísia relevante:UPF-TNI halo patrullamentu konjunta observa pilár-garante seguransa iha fronteira
Komandante Satgas-Pamtas TNI Sektór Barat, Letnan Kolonel Arh Endis Fahrul Rizal, enkoraja sidadadaun hotu tantu Timor-Leste ho Indonézia atu mantein kumpre regra fronteira nian.
“Komunidade hotu-hotu, liu-liu sira ne’ebé iha área fronteira, tantu iha Indonézia no Timor-Leste, ami husu ba ema hotu atu kontinua tuir regra, signifika fronteira nasaun sira ne’ebé eziste. Ami, nu’udar ekipa ka nu’udar ajénsia ne’ebé autorizadu atu halo guarda fronteira, hein katak komunidade sei kumpre regra iha área fronteira,” autoridade seguransa Indonézia ne’e hato’o iha lian Indonézia.
“Ami mós ajuda hodi ultrapasa komunidade iha área fronteira nia sorin, esperansa mak ho ami-nia prezensa, tantu UPF no TNI, ami sei bele ajuda fornese buat pozitivu ba komunidade atu nune’e bele kria seguransa no envolvimentu iha fronteira,” nia konklui.
Jornalista: Abílio Elo Nini
Editór: Rafael Ximenes de A. Belo
