VIKEKE, 17 Dezembru 2025 (TATOLI)—Xefe Suku Uma-Ua’in Leten, Postu Administrativu Vikeke, Munisípiu Vikeke, Martinho Soares Gusmão, solisita Governu liuhusi Ministériu Administrasaun Estatál (MAE) instala liña internet ba sede suku sira iha Munisípiu Vikeke.
“Durante ne’e ami hasoru liu dezafiu ba liña internet. Ami atu hatama dadus ruma ba iha sistema labele tanba ami laiha liña internet. Tan ne’e mak ha’u hakarak husu ba Governu se bele instala rede internet ba kada suku, atubele fasilita ofisiál suku sira hatama dadus ba sistema,” Martinho Soares Gusmão hateten ba TATOLI iha resintu Munisípiu Vikeke, Kuarta ne’e.
Martinho haktuir durante suku sira enfrenta liña internet ba atualiza dadus, autoridade sira esforsu uza pulsa Telemor, Timor Telekom ba ativasaun internet, maibé rede la’o ladi’ak.
Aleinde ne’e, nia relata, kana-ba fasilidade hanesan komputadór Governu apoia ona hodi fasilita servisu, falta mak rede internet atu atualiza dadus ba sistema.
Hatán ba preokupasaun ne’e, reprezentante Ministru Administrasaun Estatál (MAE), Amandio Paulino Gastão do Rosário de Sousa, tenik, kona-ba preokupasaun rede internet daudaun ne’e DNIK hahú instala liña internet ba uluk postu administrativu sira, suku seidauk.
“Kona-ba preokupasaun liña internet ba suku sira ita seidauk estabelese. Agora ita instala uluk liña internet ba edifísiu postu sira iha Vikeke. Ba suku sira ita sei realiza iha tinan 2026,” nia informa.
Entretantu, Munisípiu Vikeke iha suku hamutuk 38, iha-ne’ebé postu administrativu Ossú iha suku sanulu (10), Vikeke Vila suku sanulu (10), Lakluta suku haat (4), Uatulari suku ualu (8) no Uatukarbau suku neen (6).
Jornalista: Vitorino Lopes da Costa
Editór: Xisto Freitas da Piedade
