DILI, 17 Dezembru 2025 (TATOLI)—Ministériu Asuntu Kombatente Libertasaun Nasionál (MAKLN) ho Konsellu Kombatente Libertasaun Nasionál (CCLN-sigla portugeza), Kuarta ne’e, realiza kongresu daruak ho tema “Unidos Para Desenvolvimento Nacional” ne’ebé mak halo durante loron tolu (17-19 Dezembru) iha Dili.
Prezidente CCLN, Vidal de Jesus “Riak Lemak”, hateten ohin veteranu hotu-hotu hamutuk iha fatin ne’e atu realiza Kongresu Nasionál CCLN ba daruak nian. Tuir loloos kongresu ne’e halo iha tinan 2024 maibé tanba okupadu ho servisu entaun muda mai tinan ida-ne’e.
“Servisu ba veteranu sira ulun moras. Ne’e lá’os foin agora. Dezde harii Komisaun Omenajen mosu to’o agora ulun moras,” Prezidente CCLN dehan iha Salão dos Mártires, Komoro, Kuarta ne’e.
Nia haktuir Segundu Kongresu ne’e atu aprezenta rejimentu ba iha asembleia no aprezenta hotu rejimentu no aprova hotu, tuir fali mai sei aprezenta relatóriu detalladu husi konsellu nian durante mandatu. Ida-ne’e hotu tiha sei hili meza verifikasaun podér, depoiz meza konferénsia, ida-ne’e hotu maka foin halo eleisaun.
Riak Leman informa kongresu daruak ne’e partisipa husi delegadu na’in-65 husi munisípiu hotu-hotu no mós observadór sira. Delegadu sira husi munisípiu sira maka sei vota.
Iha fatin hanesan, Jenerál Reformadu, Lere Anan Timur informa kongresu daruak ne’e atu dIskuste ho ulun malirin oinsá atu reavalia saida mak halo ona no saida mak seidauk.
“Pakote ba Prezidente CCLN tenke rua ka tolu, labele ida de’it,” nia fó-hanoin.
Nia hateten iha kongresu ne’e veteranu sira tenke define kna’ar sira-ne’e, define métodu no forma di’ak sira atu servisu hamutuk.
“Ha’u husu ba alin sira-ne’ebé servisu hamutuk ho sira estrutura hodi servisu ho konxiénsia, servisu ho responsabilidade. Loloos ne’e jerasaun patriota mak servisu ho sira, para sira hanoin nafatin nia aman ka nia maun nia mate, la’ós hanoin uluk mak osan,” nia tenik.
Nia mós solisita veteranu sira halo servisu ho didi’ak, servisu ho laran moos, tanba veteranu iha-ne’e reprezenta maluk sira-ne’ebé mate ona.
Aleinde ne’e, Primeiru Ministru Internu, Atuál Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Abitasaun Rurál, Mariano “Assanami” Sabino lori Primeiru-Ministru nia naran husu atu define didi’ak papél veteranu nian, tanba papél veteranu atu nafatin haburas prinsípiu eroi sira iha instituisaun Estadu.
“Kongresu ida-ne’e importante para re-define papél veteranu iha konstrusaun Estadu iha dezenvolvimentu nasionál, papél veteranu atu nafatin haburas prinsípiu eroi sira-nian iha instituisaun sira, ida-ne’e importante,” nia dehan.
Entretantu, kongresu nasionál daruak ne’e abertu husi Primeiru-Ministru Interinu, Mariano Sabino, Ministru Asuntu Kombatente Libertasaun Nasionál, Gil “Oan Soru” no partisipa husi Reprezentante Prezidente Repúblika, Komisáriu Antí-Korrupsaun, Prezidente Tribunál Rekursu, Prezidente Parlamentu Nasionál, Eis Jenerál Reformadu, Lere Anan Timur, Estrutura CCLN munisípiu 13 inklui Rejiaun Administrativu Espesiál Oekusi Ambenu no mós veteranus sira.
Jornalista: Osória Marques
Editór: Xisto Freitas da Piedade
