PNTL kaptura ona suspeitu SX oho nia aman iha Vikeke
VIKEKE, 18 Dezembru 2025 (TATOLI)—Komadante Polísia Nasionál Timor-Leste (PNTL) Munisípiu Vikeke, Superitendente Polísia António Rego Fernandes, hateten PNTL kaputura ona suspeitu inisiál SX ne’ebé oho vítima Deolindo Pinto iha Aldeia Manehat, Suku Karaubalu, postu Vikeke Vila, Munisípiu Vikeke, 08 Dezembru 2025.
Nia haktuir kazu agravadu ne’e mosu hahú husi haksesuk malu entre família uma-laran hanesan oan no aman, maibé ikus suspeitu SX taa vítima (aman rasik) iha parte kakorok rezulta vítima mate fatin, depoiz suspeitu foti mina-rai rega tan ba vítima nia leten hodi sunu.
“Depoizde akontese, suspeitu halai sees husi fatin akontesementu. Nune’e, ami promove kazu ne’e ba parte Ministériu Públiku (MP) hodi kontinua kanaliza ba Tribunál no Tribunál hasai karta mandadu detensaun. Tan ne’e, bazeia ba mandadu ne’e ami buka tuir suspeitu iha Vikeke laran durante loron sanulu (10), maibé la hetan suspeitu. Iha horikalan (17/12) mak ami hetan fali informasaun husi servisu informasaun sekreta husi Dili katak suspeitu iha Dili, ne’ebé ami kontaktu ba komandu Dili. Nune’e, ohin tuku 08h00 ekipa PNTL halo kapturasaun ba suspeitu iha Suku Bairru-Pité. Daudaun ne’e, suspeitu detein ona iha sela polísia Dili. Ohin dadeersan ha’u orienta membru PNTL parte investigasaun Vikeke dezloka bá Dili hodi transporta fali suspeitu mai Vikeke, hodi kontinua halo prosesu ba Tribunál,” António Rego Fernandes ba jornalista sira iha ninia kna’ar fatin, Munisípiu Vikeke, Kinta ne’e.
Entretantu, bazeia ba karta auto-detensaun iha loron-Kinta, 18 Dezembru 2025, tuku 08h00 Otl, servisu ekipa PNTL ezekuta mandadu detensaun husi Tribunál Munisipál Baukau ho NUC 0012/25 Vqsic, hodi hala’o detensaun ba suspeitu SX iha Prizaun Bekora.
Jornalista: Vitorino Lopes da Costa
Editór: Xisto Freitas da Piedade
