DILI, 09 Dezembru 2025 (TATOLI)–Vise Reitór Asuntu Akadémiku no Garantia Kualidade Universidade Nasionál Timor Lorosa’e (UNTL), Samuel Freitas hateten estudante finalista UNTL hamutuk 2.740 sei simu graduasaun ba da-XXXIII iha 22-23 Dezembru tinan ne’e.
“Loron ne’ebé atu realiza graduasaun ba estudante finalista mak iha 22-23 Dezembru. Totál estudante hamutuk 2.740 inklui ho pós-graduasaun iha nai’n-30,” Vise-Reitór dehan ba jornalista sira iha kampus sentrál UNTL, Tersa ne’e.
Nia esplika iha 22 Dezembru dadeer ba Fakuldade Edukasaun no Umanidade de’it tanba estudante finalista barak no mós iha 23 Dezembru dadeer ba Fakuldade Medisina Siénsia no Saúde de’it. Enkuantu, fakuldade sira seluk sei realiza hafoin sesaun dadeer.
Notísia relevante: Finalista 1.584 UNTL simu graduasaun
Fakuldade Edukasaun no Umanidade iha finalista na’in-730, Fakuldade Agrikultura na’in-171, Fakuldade Enjeñaria na’in-224, Fakuldade Siénsia Ezata na’in-sia (9), Fakuldade Ekonomia no Jestaun na’in-275,
Fakuldade Medisina Siénsia Saúde na’in-624, Fakuldade Siénsia Sosiál na’in-445, Fakuldade Direitu 66, Fakuldade Filozofia 59, Fakuldade Turizmu Arte no Indústria Criativas 107.
Lembra hikas katak períodu ida liubá UNTL fó graduasaun ba estudante finalista sira hamutuk 1.700 iha 30-31 Jullu 2025.
Jornalista: Osória Marques
Editór: Xisto Freitas da Piedade
