VIKEKE, 17 Dezembru 2025 (TATOLI)—Koordenadór ekipa Ministériu Administrasaun Estatál (MAE), Amandio Paulino Gastão do Rosário de Sousa, hateten ekipa MAE halo aprezentasaun prosesu rekolla kona-ba baze dadus ba xefe suku no administradór sira iha Munisípiu Vikeke.
“Ohin ita enkontru ho autoridade lokál sira kona-ba baze dadus nian ho objetivu oinsá mak atu asegura integrasaun dadus me’ebé verifika no autoriza ne’ebé iha sistema dijitál munisipál mak hanesan sistema informasaun kompostu husi monografia, demografia no dadus eleitór,” Amandio Paulino hateten iha Salaun Administrasaun Munisipál Vikeke, Kuarta ne’e.
Amandio esplika, partilla informasaun baze dadus ne’e ninia alvu prinsipál mak ba diretór servisu Munisipál Vikeke, administradór postu lima no xefe suku sira hodi idak-idak relata dadus sira.
“Durante loron tolu iha Munisípiu Vikeke, depoiz ida-ne’e hotu ha’u sei relata ba ministru. Tanba realiza atividade ida-ne’e bazeia ba orientasaun MAE nian. Tan ne’e ami mai Munisípiu Vikeke hodi aprezenta matéria sira kona-ba rekolla dadus sira, nune’e ha’u husu alvu prinsipál sira tenke partisipa ho di’ak, atubele komprende prosesu baze dadus ba sistema dijitál,” nia akresenta.
Iha fatin hanesan, Prezidente Autoridade Munisípiu (PAM) Vikeke, Francisco C. S. de Gonzaga Soares haktuir ohin ekipa nasionál destaka mai Munisípiu Vikeke hodi aprezenta kona-ba prosesu rekollamentu dadus, verifika dadus, reajustamentu dadus no avalia dadus ba integrasaun sistema dijitál munisipál nian.
“Ha’u sente ida-ne’e importante tebes. Ita tenke prepara ita-nia aan bainhira ita hakat bá desentralizasaun no podér lokál buat hotu ita prenxe rekizitu husi nasionál liuliu ba dijitalizasaun dadus sira-ne’ebé atualizadu. Tan ne’e, ha’u agradese ba ekipa ne’ebé mai Munisípiu Vikeke hodi ajuda ami ba prosesu rekolla dadus nian,” nia subliña.
Iha sorumutu ne’e, Xefe Suku Makadike de Baixo, Rogério da Silva, husu ekipa nasionál bá-oin presiza reforsa formasaun ba ofisiál suku sira atu sira iha koñesimentu ba prenxementu dadus inklui prenxementu livru 18.
Entretantu, partisipa iha sorumutu aprezentasaun baze dadus ne’e husi PAM, sekretariu munisipál na’in-tolu, diretór servisu munisipál, administradór postu lima hanesan Lakluta, Ossú, Uatulari, Vikeke Vila, Lakluta no Uatukarbau inklui xefe suku no tékniku kada postu sira.
Jornalista: Vitorino Lopes da Costa
Editór: Xisto Freitas da Piedade
