VIKEKE, 11 Dezembru 2025 (TATOLI)—Diretór Servisu Ministériu Agrikultór, Peska, Pekuária no Floresta (SMAPPF) Munisípiu Vikeke, Olívio Soares Freitas informa SMPPF Vikeke distribui ró-peska hamutuk unidade sanulu (10) ba grupu peskadór sira hodi uza peska ikan iha tasi.
“Ró-peska unidade sanulu (10) ne’ebé Ministru Agrikultura, Peska, Pekuária no Floresta (MAPPF) hamutuk ho Sekretáriu Estadu Peska (SEP) distribui ba Prezidente Autoridade Munisípiu (PAM) Vikeke iha loron 28 fulan-Novembru ne’e, ami distribui tutan ona ba ita-nia grupu peskadór sira,” Olívio ba TATOLI iha edifísiu Munisípiu Vikeke, Kinta ne’e.
Olívio klarifika ró-peska ne’e iha momentu ministru distribui ba PAM no SMAPPF Vikeke simu tiha la konsege distribui ba grupu sira, entun agora mak SMAPPF koordena fali grupu peskadór sira mai simu ró iha munisípiu.
Nia esplika distribuisaun ró ne’e realiza tanba grupu sira hato’o pedidu ba MAPPF no konsidera katak apoia ró ne’e sei fasilita grupu sira hodi kaer ikan iha tasi laran, atu fa’an filafali ba komunidade konsumidór sira.
Jornalista: Vitorino Lopes da Costa
Editór: Xisto Freitas da Piedade
