DILI, 17 Dezembru 2025 (TATOLI)-Sekretáriu Estadu Kooperativa, Arsénio Pereira, fó pose ba estrutura Konfederasaun Nasionál Multi-Kooperativa Timor-Leste (CNMC-TL, sigla portugés) ba períodu 2025-2029, hodi sai mahon ba Federasaun Kooperativa sira ne’ebé eziste iha Timor-Leste.
Arsénio Pereira hateten ezisténsia CNMC-TL marka istória foun ida depoizde Timor-Leste ukun-an, tanba durante ne’e iha mak federesaun kooperativa de’it, maibé laiha konfederasaun.
“Ita hotu hatene papél kooperativa importante ba dezenvolvimentu ekonomia nasaun nian. Ho ida-ne’e ezisténsia konfederasaun ba oin sei sai mahon ba federesaun sira ne’ebé iha, hamutuk dezenvolve setór kooperativu ne’e hodi kontribui ba ita-nia dezenvolvimentu ekonomia nasaun nian”, Arsénio Pereira hateten iha salaun CNE, Kaikoli Dili, ohin.
Prezidente Konfederasaun Nasionál Multi-Kooperativa Timor-Leste, Tito da Costa, hateten, Federasaun Kooperativa 11 husi munisípiu Lautein, Vikeke, Aileu, Likisá no seluk tan, mak halibur hamutuk hodi estabelese CNMC-TL.
“Konfederasaun ne’e harii ho inisiativa rasik oinsá bele reprezenta Federasaun Kooperativa sira iha munisípiu hotu. Ami hamutuk hodi kontribui ba dezenvolvimentu nasionál”, dehan.
Nia hateten katak maski CNMC-TL ne’e foin harii, maibé fiar katak sei fó kontribuisaun ne’ebé di’ak ba dezenvolvimentu nasionál. “Ami-nia difikuldade mak foin harii seidauk iha edifísiu atu fasilita ami atu halo serbisu, maibé ami sei halo esforsu aumezmu tempu buka fatin”, dehan.
Ho obstákulu sira ne’ebé iha, Konfederasaun hakarak rekomenda ba SEKoop atu legaliza kooperativa primária sira, tanba bainhira atu trata dokumentu ruma presiza legalidade, presiza halo karta ba Prezidente Autoridade Munisípiu sira hodi fasilita fatin ba Federasaun Kooperativa sira.
Aleinde ne’e, husu mós ba SEKoop atu iha future tau planu iha Orsamentu Jerál Estadu (OJE) hodi fó intensive, nune’e bele fasilita federasaun sira halo sira-nia Natividad.
“Husu mós fasilita formasaun ba ami, halo estudu komparativu ho nasaun sira seluk, apoia mobiliáriu ba federasaun iha munisípiu sira, no apoia Koonfederasaun hamutuk ho SEKoop ho banku bele hetan kréditu ba kooperativa, kria sentru formasaun multifunsaun ba kooperativa iha Dili”, nia sujere.
Planu estratéjiku CNMC-TL durante mandatu mak fortalese instituisional, sei halo konsolidasaun ba federasaun sira atu hametin instituisaun no disamina estatutu CNMC-TL ba membru sira no seluk tan.
Membru CNMC-TL ne’ebé ohin simu pose ne’e hamutuk na’in-ualu, kompostu husi Prezidente CNMC-TL Tito da Costa, Vise-Prezidente, Rique Ricardo, Sekretária Elsa da Costa, Tezoreira Maria Fátima, no Vogál Mario Almeida no seluk tan.
Jornalista: Arminda Fonseca
Editora: Maria Auxiliadora
