DILI, 17 Dezembru 2025 (TATOLI)—Governu liuhusi desizaun koletiva iha Konsellu Ministru delibera no aprova roteiru Timor-Leste ba dezenvolvimentu merkadu abitasionál.
Roteiru ne’e define vizaun ida-neʼebé abranjente ba setór abitasionál, ne’ebé estruturadu iha eixu prinsipál haat hanesan garante direitu ba rai no uma, habelar asesu ba solusaun abitasaun ne’ebé dignu no reziliente, dezenvolve sistema finansiamentu ba família sira no kria enkuadramentu institusionál no dadus ne’ebé nesesáriu atu sustenta polítika ba tempu naruk.
Abordajen ne’e tuir siklu asaun no aprendizajen nian halo, avalia no habelar hodi permite halo teste ba solusaun sira iha terrenu, inkorpora iha polítika públika no konsolida iha modelu sira-ne’ebé efetivu.
Enkuantu entre pilár sentrál sira-ne’ebé aprezenta, destaka atu hametin sistema administrasaun rai nian, análize detallada kona-ba nesesidade merkadu abitasaun nian, promove prátika konstrusaun reziliente no diversifika solusaun fornesimentu nian, inklui projetu neʼebé lidera husi setór privadu, inisiativa auto-konstrusaun no mós abitasaun komunitária no vertikál sira-ne’ebé promove husi Governu.
Aleinde ne’e, roteiru ne’e mós kontempla dezenvolvimentu graduál instrumentu finanseiru sira hodi fasilita família sira-nia asesu ba solusaun adekuada, bazeia ba diretrís no modelu sira-ne’ebé Banku Sentrál Timor-Leste (BCTL) define ona.
Nune’e, ho inisiativa ida-ne’e, Governu iha intensaun atu responde ba ezijénsia abitasaun nian ne’ebé aumenta ba beibeik no ba nesesidade atu garante uma neʼebé dignu no adekuadu ba sidadaun sira, hanesan prevee ona iha Konstituisaun no Programa Governu Konstitusionál da-sia (IX) nian, promove abordajen integradu ida ne’ebé envolve instituisaun públika sira, setór privadu no parseiru dezenvolvimentu sira, ho vizaun ida atu hadi’a kondisaun moris família timoroan sira-nian.
Jornalista : Alexandra da Costa
Editór : Cancio Ximenes
