DILI, 18 Dezembru 2025 (TATOLI)— Konsellu Ministru, kuarta ne’e, liuhusi reuniaun aprova projetu deliberasaun tolu (3) ne’ebé aprezenta husi Ministru Petróleu no Rekursus Minerál, Francisco da Costa Monteiro, kona-ba autorizasaun despeza iha ámbitu dezenvolvimentu setór petrolíferu no implementasaun infraestrutura estratéjika iha kosta súl país nian.
Bazeia ba komunikadu ne’ebé Agência Tatoli asesu projetu hirak ne’e iha ámbitu programa A13, relasiona ho dezenvolvimentu kampu gás Greater Sunrise nian no garante katak gazodutu esportasaun nian to’o iha Timor-Leste.
Tanba ne’e, Timor-Leste hetan autorizasaun ba despeza hodi hala’o levantamentu jeotékniku ba gazodutu Greater Sunrise no gazodutu Bayu Undan nian, hodi kobre lote rua keta-ketak, ba períodu entre 2025 no 2027, maizumenus korresponde millaun $36 iha Lote 2 no maizumenus millaun $12,9 iha Lote 1.
Enkuantu iha fali ámbitu programa A18, relasiona ho implementasaun Projetu Tasi Mane iha kosta súl nasaun nian.
Nune’e, iha biban ne’e, Konsellu Ministru mós autoriza despeza ba reabilitasaun husi parte auto-estrada ne’ebé eziste ona, inklui konstrusaun pasajen subterráneu rua (2). Intervensaun ida-ne’e, halo parte iha subprograma dezenvolvimentu infraestrutura hodi apoia Projetu Tasi Mane, reprezenta investimentu maizumenus millaun $13,5.
Jornalista : Alexandra da Costa
Editór : Cancio Ximenes
