Ramos-Horta apresia filme “The Last Accord: War, Apocalypse, and Peace in Aceh”
DILI, 17 Dezembru 2025 (TATOLI)—Prezidente Repúblika, José Ramos-Horta, kuarta ne’e, asiste no halo apresiasaun ba filme dokumentáriu ‘The Last Accord: War, Apocalypse, and Peace in Aceh’ ne’ebé lidera husi Dino Patti Djalal ne’e haktuir kona-ba istória rekonsiliasaun iha provínsia Aceh, Indonézia.
Prezidente sei lembra amizade ne’ebé metin entre Timor-Leste no Indonézia, hodi subliña katak dokumentáriu ne’e nu’udar rekursu edukativu vitál ida, no Prezidente elojia reziliénsia povu Aceh nian, hodi nota katak maske natureza luta iha Timor-Leste no Aceh-Indonézia la hanesan, nasaun rua ne’e fahe istória kle’an kona-ba superasaun konflitu hodi harii futuru ida-ne’ebé dinámiku.
“Hodi refleta kona-ba Memorandu Entendimentu Helsinki 2005 nian, ha’u fó omenajen ba korajen polítika ne’ebé hatudu hafoin tsunami devastadór iha 2004 no espesifikamente apresia lideransa eis-Prezidente Susilo Bambang Yudhoyono no Vise-Prezidente Jusuf Kalla, hodi afirma katak sira-nia papél fundamentál hodi muda foku husi luta armada ba sobrevivénsia umana no dame, halo sira merese simu Prémiu Nobel da Paz,” Ramos-Horta hateten iha nia diskursu iha Fundasaun Oriente, ohin.
Prezidente enfatiza katak prosesu dame iha Aceh serve nu’udar testemuña poderoza ba mundu katak estabilidade ne’ebé duradoura harii bazeia ba kompromisu ne’ebé nesesáriu no vontade loloos hodi tau uluk dignidade umana duké kria odiu ba malu kona-ba pasadu.
Durante eventu ne’e, Xefe Estadu hato’o mós ninia kondolénsia profunda kona-ba inundasaun no rai-halai foin lalais ne’e iha Indonézia, hodi reafirma solidariedade Timor-Leste nian ho nasaun viziñu durante tempu susar sira.
Prezidente Ramos-Horta temi kona-ba dinamizmu ekonómiku Aceh nian agora nu’udar prova husi “dividend dame nian” (peace dividend), hodi espresa esperansa katak istória reziliénsia ne’ebé dokumenta iha filme ne’e sei kontinua inspira rezolusaun konflitu globál.
Prezidente Ramos-Horta kongratula ekipa produsaun tanba prezerva ona kapítulu istória importante ne’e, ne’ebé serve nu’udar lembrete katak dame la’ós buat ida ne’ebé hamriik mesak de’it maibé presiza dedikasaun nafatin.
Jornalista : Hortencio Sanchez
Editór : Cancio Ximenes
