DILI, 18 Dezembru 2025 (TATOLI)—Kombatente Libertasaun Nasionál rejistadu 2009 preokupa ho atendimentu Ministériu Asuntu Kombatente Libertasaun Nasionál (MAKLN) ba fixa pagamentu tanba komplikadu tebes.
Veterana Irie da Costa “Talinoko”, husi Munisípiu Baukau, dehan se bele tau dala ida kedas ho karimbu no asinatura nune’e labele halo prosesu kle’ur liután.
“Ha’u sai husi Baukau ho bus jam 05:00. Depoiz mak sena malu tan halo ita dada iis la hetan tanba ita mós idade ona. Entaun, ba atendimentu ida-ne’e ita husu para hadi’a prosesu atendimentu fixa pagamentu. Se la’e ami sofre ba daruak, ai-laran no simu direitu ida-ne’e. Bá-oin presiza hadi’a,” Talinoko hateten ba TATOLI iha resintu MAKLN, Komoro, Kinta ne’e.
Talinoko hatutan kada munisípiu iha nia Konsellu Kombatente Munisipál tanba saida mak labele loke iha-ne’ebá, tenke mai iha nasionál depoiz halo terus ema ne’ebé idade ona no labele hamriik kle’ur sira-ne’e.
Notísia relevante: Ekipa SNAEM rejista kombatente na’in-sanulu dezmaia
“Envezde mai iha-ne’e fahe oráriu kada munisípiu, nune’e labele mai butuk iha fatin. Oráriu iha maibé la fó-sai sedu para ami la’o tuir ida-ne’e. Agora ema hotu-hotu tun sena-malu no ikus balun tenke tama ospitál. Tanba ne’e, hakarak hato’o ba boot sira atu hadi’a sistema atendimentu ne’e,” nia preokupa.
Nune’e mós, Veterana Teresa Martins, husi Munisípiu Aileu lamenta ho MAKLN nia atendimentu ba veteranu sira tanba hein kle’ur to’o hamlaha no hamrook.
“Ha’u simu tiha ona fixa, maibé sei hein tan atu hasai foto. Ha’u ohin monu dala-tolu ona mak mai tur tiha, hodi hein ba fali hasai foto. Ida-ne’e presiza hadi’a, se lae ema bele mate,” nia haktuir.
Enkuantu, Veterana Rufina Barros, husi Munisípiu Bobonaru, hateten ohin sai husi uma mai dadeersan nakukun de’it, to’o mai ema barak ona, maibé pasiénsia hodi hein no to’o ona meiudia ona maibé seidauk simu fixa pagamentu.
“Ha’u to’o agora seidauk simu fixa pagamentu ne’e. Ha’u mai dadeersan nakukun. Agora sente kolen mak tuur tiha iha-ne’e, uitoan tan mak bá forma fali,” nia akresenta.
Jornalista TATOLI koko konfirma asuntu ne’e ba Ministru Asuntu Kombatente Libertasaun Nasionál, Gil da Costa Monteiro “Oan-Soru” maibé la konsege tanba okupadu ho Segundu Kongresu Nasionál Konsellu Kombatente Libertasaun Nasionál (CCLN-sigla portugeza).
Jornalista: Osória Marques
Editór: Xisto Freitas da Piedade
