ÐILI, 09 Dezembru 2025 (TATOLI) – Sekretáriu Estadu Komunikasaun Sosiál (SEKOMS) Expedito Dias Ximenes konvoka enkontru ho Embaixadór Japaun mai Timor-Leste, Tetsuya Kimura no reprezentante Programa Nasaun Unida ba Dezenvolvimentu (PNUD), Katyna Argueta, hodi koalia kona-ba dezeñu foun ba edifísiu Rádiu Televizaun Timor-Leste, Empreza Públika (RTTL, EP).
“Agora Governu Japaun ho Governu Timor-Leste hamutuk ho UNDP halo fali reuniaun ohin atu kontinua fali projetu ida-ne’e. Projetu ida-ne’e agora halo dezeñu foun, ohin sira hato’o, agora iha ona kompañia manán ona atu halo dezeñu foun,” Sekretáriu Estadu Expedito Dias Ximenes, ko’alia iha salaun Kofi Anan Kampaun UN, Kaikoli, tersa ne’e.
Nia esplika, ba konstrusaun ba edifísiu RTTL nian hothotu hatene iha atrazu, liuliu ba kompañia ida husi Indonézia ne’ebé manán. Maibé hafoin nia atu halo konstrusaun iha fulan tolu bee ne’e sa’e maka’as.
“Nia (kompañia) haree katak nia laiha kapasidade entaun rezigna-an,” nia dehan.
Tanba Governu Timor-Leste hamutuk reprezentante Japaun iha Timor-Leste no reprezentante PNUD ko’alia hodi haree fali konstrusaun edifísiu RTTL, EP.
“Dezeñu ne’e sei hotu iha fulan rua nia laran, komesa ohin to’o fevereiru. Sira sei aprezenta fali mai ami no sei haree fali,” nia informa.
Governante ne’e dehan, dezeñu foun ba konstrusaun edifísiu RTTL,EP sei iha mudansa tanba dezeñu ne’ebé molok ho konstrusaun edifísiu RTTL andár haat.
Maibé, Sekretáriu Estadu Komunikasaun Sosiál, fó-sai katak, dezeñu ida agora diminui ba andár tolu tanba haree ba kondisaun rai ne’ebé iha Kaikoli, tanba andár haat ne’e la aguenta ho rai Kaikoli nian entaun propoin diminui ba andár tolu.
Expedito dehan, empreza ne’ebé mak sai mánan-na’in ba redezeña edifísiu RTTL foun ne’e mak empreza husi Indonézia naran PT Amitas.
Nia informa, redezeñu ba konstrusaun edifísiu RTTL EP hahú dezembru no finaliza iha fevreiru, no marsu hahú loke konkursu públiku ba empreza ba konstrusaun. Projetu ne’e iha de’it fulan 16 signifika hahú 2026 no remata iha setembru ka outobru 2027.
Nia dehan, redezeña ba konstrusaun edifísiu RTTL,EP nafatin totál uza osan ne’ebé Governu Japaun fó mai ho totál millaun $5,1.
Husi montante ne’e koloka millaun $4.4 ba konstrusaun edifísiu RTTL,EP, enkuantu millaun ida-resin ne’e PNUD parseria ho Konsellu Imprensa Timor-Leste fó formasaun ba jornalista sira.
Iha fatin hanesan, Embaixadór Japaun ba Timor-Leste Tetsuya Kimura hateten, enkontru ida ohin diskute kona-ba atu avansa projetu konstrusaun edifísiu RTTL nian ba futuru.
“Durante enkontru ida-ne’e ha’u renova ha’u-nia kompromisu hodi reprezenta Governu Japaun hodi apoia projetu ida-ne’e,” nia katak.
Nu’udar Embaixadór komprende katak konstrusaun ba edifísiu ne’e enfrenta dezafiu rai nian, maibé bazea ba dezafiu sira ne’ebé ko’alia, liuhusi enkontru ne’e ohin diskute ona oinsá rezolve dezafiu sira-ne’e.
“Japaun nafatin iha kompromisu halo avansu ba projetu ida-ne’e. Maibé antes atu to’o ba iha ne’ebá ita presiza halo revizaun,” nia hateten.
Reprezentante Programa Nasaun Unida ba Dezenvolvimentu (PNUD), Katyna Argueta, informa, projetu edifísiu RTTL EP ne’e atu haforsa partisipasaun demokrátika husi sidadaun sira-nian.
“Agora UNDP hahú ona halo kontratu ba iha empreza foun atu redezeña fali konstrusaun ba edifísiu RTTL nian,” nia informa.
Jornalista: Natalino Costa
Editór: Evaristo Soares Martins
