Xanana no Ramos-Horta solisita BCTL reforsa seguransa sistema pagamentu dijitál

DILI, 12 Setembru 2026 (TATOLI)—Primeiru-Ministru (PM), Kay Rala Xanana Gusmão no Prezidente Repúblika (PR), José Ramos-Horta, solisita Banku Sentrál Timor-Leste (BCTL) no banku komersiál sira seluk atu reforsa seguransa iha sistema pagamentu dijitál.

“Ha’u sente katak problema boot ida iha hela ha’u-nia ulun mak problema saida mak akontese ona. Maluk sira husi Europa mai buka tuir ita-nia maluk sira ba iha ATM, hasai hotu tiha ema nia osan,” PM Xanana dehan iha lansamentu sistema TI-FAST TUQR, iha Timor Plaza, Sábadu ne’e.

Tanba ne’e, nia solisita ba BCTL no banku sira atu tau atensaun maka’as ba asuntu ne’e, nune’e evita akontesimentu sira-ne’e.

“Ida-ne’e ha’u husu ba BCTL no banku sira seluk atu tau atensaun ba ida-ne’e no buat seluk ne’ebé bele mosu tan. Sempre iha ema malandru ne’ebé matenek tebes bele uza fali ida-ne’e hodi estraga ita-nia komunidade. Tanba ema bele hasai sira-nia osan iha ATM,” nia afirma.

Sorin seluk, Prezidente Repúblika José Ramos Horta mós preokupa ba implementasaun padraun pagamentu sistema dijitál.

“Problema boot ida mak uza eletróniku. Ema bele tama iha ita-nia konta, bele lori sai hotu osan,” nia dehan.

Nia fó ezemplu husi esperiénsia uluk ho uza kartaun kréditu, tanba ne’e otél barak iha rai-liur lakohi uza kartu kreditu.

“Uluk kartaun kréditu otél barak la uza. Tanbasá, tanba tauk. Se ó fó kartaun kréditu, sira haree ó nia kódigu, sira bele lori hotu osan,” nia esplika.

Nune’’e, Prezidente Ramos-Horta husu banku sira atu uza sistema protesaun ida-ne’ebé forte atu garante utilizadór sira-nia dadus.

Tanba ne’e, PR Horta husu atu utilizasaun sistema pagamentu iha Timor-Leste tenke protesaun ne’ebé forte, efetivu atu garante utilizadór sira-nia dadus pesoál.

Jornalista : Osória Marques

Editór        : Cancio Ximenes