HNGV sei publika vaga 400-resin ba profisionál saúde iha semana oin
DILI, 18 Agostu 2026 (TATOLI)—Diretor Servisu Apoiu Diagnóstiku Terapeutiku iha HNGV, Vidal de Jesus Lopes, informa iha semana oin ne’e Hospitál Nasionál Guido Valadares (HNGV) sei publika vaga 400-resin ba profisionál saúde.
Diretor Servisu Apoiu Diagnóstiku Terapeutiku iha HNGV, Vidal de Jesus Lopes, hateten kona-ba prosesu rekrutamentu sei anúnsia ba públiku iha semana oin, tanba rekrutamentu esforsu husi Hospitál Nasionál Guido Valadares atu reforsa rekursu umanu no hadi’a kualidade servisu saúde ba komunidade.
“Atu informa ba públiku katak ospitál nasionál prevee orsamentu ba rekrutamentu ba tinan ida-ne’e, rekrutamentu ba funsionáriu sira-ne’e kompostu husi médiku, parteira, infermeiru, tékniku aliadu no asisténsia enfermeiru maibé orsamentu ba rekrutamentu. Ha’u labele mensiona enprinsipiu ami prevee ona no semana oin sei publika, nune’e aplikante sira mai konkore,” Vidal de Jesus Lopes ba jornalista sira iha nia kna’ar fatin HNGV, Bidau Tokoh Baru, ohin.
Nia haktuir, prosesu rekrutamentu ne’e mai husi Hospitál Nasionál Guido Valadares, Ministériu Saúde no mós Komisaun Funsaun Públiku.
“Prosesu administrativu entre HNGV, MS ho KFP. Tentativa semana oin ami sei taka sai vaga rekrutamentu ba públiku, nune’e aplikante sira mai konkore ba vaga refere,” nia hateten.
Nia haktuir informasaun ne’ebé disponivél, detallu kona-ba kategoria vaga ka kritériu kandidatura, dokumentus ne’ebé presiza, tuir prazu entrega no prosedimentu selesaun sei hatudu iha anúnsiu ofisiál bainhira vaga sira publika.
“HNGV hein katak oportunidade rekrutamentu ne’e bele fó espasu ba ema barak, liuliu ba profisionál no kandidatu sira-ne’ebé iha kualifikasaun atu kontribui ba servisu saúde nasional. Tanba ne’e, husu kandidatu sira interese tenke akompaña komunikasaun ofisiál HNGV atu hetan informasaun kompletu kona-ba vaga 400-resin ne’e no evita depende ba informasaun ne’ebé la’ós fonte ofisiál,” nia dehan.
Antes ne’e, Ministra Saúde, Élia dos Reis hateten, loos duni Hospitál Nasionál Guido Valadares hatoo ona pedidu rekrutamentu mai, maibé seidauk haruka ba Komisaun Funsaun Públiku tanba sei okupadu ho servisu uitoan.
“Pedidu HNGV nian mai ona, ha’u hanoin iha tempu badak ami sei fó sai ona. Daudaun ne’e iha hela ha’u nia meza. Ha’u seidauk manda ba Komisaun Funsaun Públika, tanba ha’u sei okupadu ho traballu, maibé Segunda semana oin ha’u bele manda ona ba Komisaun Funsaun Públiku atu nune’e bele haree ba rekrutamentu ne’e rasik,” Ministra Saúde Élia dos Reis hateten ba Jornalista sira iha Salaun Novu Turizmu.
Jornalista : Felicidade Ximenes
Editór : Cancio Ximenes
