Primeiru-Ministru asume kargu Ministru Defeza interinu
DILI, 19 Agostu 2026 (TATOLI)-Primeiru-Ministru, Xanana Gusmão, asume kargu Ministru Defeza interinu hodi asegura funsionamentu ministériu durante Ministru Defeza, Kontra Almirante Donaciano Costa Gomes ‘Pedro Klamar Fuik’, hala’o tratamentu saúde iha Malázia.
Informasaun ne’e hato’o husi Vise-Xefe-Estadu-Maiór Jenerál FALINTIL-Forsa Defeza Timor-Leste (F-FDTL), Majór-Jenerál Calistro dos Santos Coli “Coliati”.
Coliati dehan durante Ministru Defeza hala’o tratamentu saúde iha rai-li’ur, funsionamentu iha Ministériu Defeza kontinua la’o normál.
“Ministru nia kondisaun, ami-nia doutór akompaña iha Malázia, fó informasaun mai katak ministru nia estadu saúde agora di’ak, tanba hetan ona asisténsia husi ekipa médika Malázia nian”, nia adianta iha Kuartél Jerál F-FDTL, Fatuhada, ohin.
Antes ne’e, Gabinete Ministru Defeza informa ona ba públiku kona-ba estadu saúde ministru nian ne’ebé iha kondisaun moras hela.
Notisía relevante: Gabinete Ministru Defeza klarifika Ministru Pedro Klamar Fuik nia kondisaun saúde
Jornalista: Arminda Fonseca
Editora: Maria Auxiliadora
