PD realiza konferénsia munisipál atu hametin no hili estrutura foun iha Kovalima
KOVALIMA, 12 Setembru 2026 (TATOLI)–Partidu Demokrátiku (PD), Sábadu (12/9) ne’e, hala’o Konferénsia Munisipál ba da-haat iha Munisípiu Kovalima hodi hametin estrutura partidu no hili estrutura foun ba mandatu tinan lima, inklui preparasaun ba eleisaun prezidensiál no parlamentár.
Prezidente Partidu Demokrátiku (PD), Mariano Assanami Sabino Lopes, hateten katak konferénsia ne’e sai nu’udar meiu importante atu konsolida estrutura partidu no afirma prinsípiu, ideolojia no programa PD atu la’o ba oin.
“Konferénsia ne’e hanesan dalan ida atu ita bele konsolida estrutura fundadór sira, afirma ita-nia prinsípiu, ideolojia no programa atu la’o ba oin,” Mariano Assanami iha nia diskursu molok abertura konferénsia iha Kovalima.
Nia subliña katak konferénsia ne’e la’ós atu halo kompetisaun entre membru sira maibé atu hametin unidade, halo rekonsiliasaun no konsolida partidu.
Nia apela ba família Demokrátiku atu kontinua halo diskusaun no debate ho razaun, maske iha diferensa hanoin.
“Ita-nia família Demokrátiku tenke metin no forte. Maske iha diferensa, ita tenke uza kakutak no razaun atu hametin família. Estrutura ne’e reprezenta ita no reforsa ita atu hasa’e votu,” nia hateten.
Mariano hateten, misaun prinsipál PD nian mak promove valór no prinsípiu demokrásia repúblikana atu sai lisan ba ukun no moris. Tanba ne’e, atividade konferénsia no kongresu importante atu afirma identidade no luta polítika partidu.
Iha sorin seluk, Prezidente PD Munisípiu Kovalima, Julio do Carmo, hateten katak konferénsia ne’e hala’o hodi hili estrutura foun ba mandatu tinan lima. Estrutura foun ne’e sei sai baze importante ba PD atu prepara partisipasaun iha eleisaun prezidensiál no parlamentár.
Konferénsia ne’e ho tema “Hamutuk Ita Hari’i Timor Foun Ida ba Timor-Oan Tomak Hodi Dignifika Estrutura Partidu Demokrátiku Husi Nível Aldeia, Suku, Postu to’o Munisípiu”.
Estrutura PD iha nivel munisípiu sei kompostu husi prezidente ho vise-prezidente na’in-hitu, no sekretáriu-jurál ho vise-sekretáriu na’in-hitu.
Estrutura sira ne’e hili liuhusi prosesu eleisaun ne’ebé konferénsista sira mai husi postu administrativu hitu (9) iha Munisípiu Kovalima.
Atividade Konferénsia Munisipál PD ba da-haat ne’e mós partisipa husi reprezentante Partidu Libertasaun Populár (PLP), Kongresu Nasionál Rekonstrusaun Timor (CNRT) no Frente Revolusionária do Timor-Leste Independente (FRETILIN), no hetan observasaun direta husi Komisaun Nasionál de Eleisaun (CNE).
Jornalista : Celestina Teles
Editór : Cancio Ximenes
