Antigu deputadu FRETILIN Manuel Gaspar hakotu iis iha karreta laran
VIKEKE, 15 Agustu 2026 (TATOLI) – Antigu deputadu FRETILIN, Manuel Gaspar, hakotu iis iha karreta laran, iha suku Karaubalu, postu administrativu Vikeke Vila, munisípiu Vikeke.
Tuir responsavel Saúde Sentru Internamentu Vikeke Vila, Jacob Soares Sarmento, eis-deputadu ne’e ohin dadeer sai husi postu administrativu Uatulari bá munisípiu Vikeke no, pur volta tuku 07h00, to’o Vikeke atu simu Sekretáriu-Jerál Partidu FRETILIN, Marí Alkatiri. Maibé, tanba la aguenta, nia para tiha karreta no tuur iha laran mak toba dukur tiha.
“Eis-deputadu ne’e ohin atu partisipa konferénsia FRETILIN nian iha munisípiu Vikeke, depois nia to’o iha Vikeke, atu bá simu Sekretáriu-Jerál Marí Alkatiri, iha dalan, maibé nia bá kala la aguenta, entaun nia para karreta iha nian feto ida hela iha Edifísiu BTL, E.P nia oin. Tun matabixu tiha sa’e fali karreta mak toba dukur tiha. Eis-deputadu ne’e mós hanesan delegadu partidu FRETILIN nian, entaun komisaun sira telefone tuir, maibé nia la simu”, Jacob Sarmento relata ba Tatoli, iha Vikeke Vila, ohin.
Nia hatutan katak tanba komisaun sira telefone ba antigu deputadu ne’e la simu maka kontaktu fali nia feton mak bá haree iha karreta laran no bolu nia maibé la hadeer, nune’e sira deside baku rahun vidru karreta nian no hetan katak nia isin toos hotu ona.
Jacob Sarmento relata katak eis-deputadu ne’e mate pur volta iha tuku 09:00 dadeer, família sira buka fali iha karreta laran pur volta tuku 15:00 lokraik.
“Nune’e, família no komunidade deside lori bá Sentru Saúde Internamentu, maibé médiku sira labele halo ezaminasaun ba matebian, tanba mate kle’ur ona. Bá internamentu halo de’it justifikasaun”, nia dehan.
Nia esplika katak, se matebian sei iha iis, ekipa médika bele halo ezaminasaun atu ajuda determina kronolojia no kauza mate. Maibé, iha kazu ne’e, matebian mate kle’ur ona no nia isin toos hotu.
“Nune’e, família sira lori fali matebian bá nia feton Jacinta nian uma, iha suku Karaubalu, hodi hein ekipa autópsia husi nasionál. Daudaun ne’e, ami simu informasaun husi ekipa autópsia iha ona Laleia, Manatutu mai Vikeke”, nia informa.
Antigu deputadu Manuel Gaspar husi aldeia Uma Ki’ik, suku Uaitame, postu administrativu Uatulari.
Journalista: Vitorino Lopes da Costa
Editora: Maria Auxiliadora
