Indonézia hakarak hametin relasaun bilateral ho Timor-Leste iha ASEAN
DILI, 18 Dezembru 2025 (TATOLI)—Embaixadór no Reprezentante Permanente Repúblika Indonézia ba ASEAN, Derry Aman, kinta ne’e, hasoru malu ho Xefe Estadu José Ramos-Horta iha rezidensia Metiaut hodi ko’alia kona-ba Indonézia hakarak hametin relasaun bilaterál ho Timor-Leste iha ASEAN.
“Hanesan onra no ksolok ida ba ha’u durante ha’u-nia vizita mai Dili, Timor-Leste, ne’ebé hanesan ha’u-nia vizita dahuluk, hodi hasoru malu ho Prezidente Ramos-Horta. Ha’u rona ona Prezidente nia hanoin no esperiénsia oioin, ne’ebé konserteza ami bele aprende hodi hametin relasaun bilaterál entre Indonézia no Timor-Leste iha ASEAN,” Embaixadór Derry hateten.
Embaixadór ba ASEAN ne’e sente privileiju tebes bainhira Prezidente fahe esperiénsia ne’ebé fó benefísiu ba nasaun rua ne’e.
“Ha’u hetan buat ida-ne’ebé folin tebes hosi ha’u-nia konversa no diskusaun ho Prezidente Repúblika, nia fahe mós hanoin sira kona-ba oinsá mak Indonézia ho Timor-Leste bele kontinua kolabora iha kontestu hametin kooperasaun ASEAN nian. Ne’ebé ami hein katak sei fó benefísiu ba komunidade ASEAN, no liuliu ba komunidade Timor-Leste no komunidade indonéziu,” nia hateten.
Nia subliña, Indonézia mós sei hametin kooperasaun ASEAN no bilaterál, ne’ebé sei fó benefísiu ba nasaun rua (2) no sira-nia povu.
“Dala ida tan, ida-ne’e hanesan enkontru ne’ebé relativamente badak, maibé ha’u aprende buat barak kona-ba hametin kooperasaun ASEAN, hametin kooperasaun bilaterál entre Indonézia ho Timor-Leste, no oinsá Indonézia ho Timor-Leste bele hametin liután relasaun entre nasaun rua (2), liuliu kooperasaun ASEAN no kooperasaun entre Ministériu Negósiu Estranjeiru sira iha Indonézia ho Timor-Leste,” nia dehan.
Jornalista : Hortencio Sanchez
Editór : Cancio Ximenes
