OEKUSI, 18 Dezembru 2025 (TATOLI) – Ministru Administrasaun Estatál (MAE), Tomas do Rosário Cabra, kinta ne’e, inaugura edifísiu Sekretáriu Administrasaun Tékniku Administrasaun Eleitorál (STAE) iha suku Costa sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Ministru Administrasaun Estatál (MAE), Tomas do Rosário Cabral, orgullu tanba dezde 2017 to’o ohin loron, Oekusi seidauk iha edifísiu própriu atu halo melloria ba prestasaun serbisu ba nesesidade públiku ho dignu.
“Edifísiu STAE uluk iha problema hahú kedas iha 2017, maske iha tempu ne’ebá iha ona autoridade RAEOA, entaun fundu ne’e mai husi programa dezenvolvimentu integradu munisipál, Oekusi mós hetan verba ida-ne’e, maibé iha momentu ne’e, STAE laiha edifísiu tanba uluk iha admninistrasaun tuan hafoin sobu muda fali ba sentru juventude Oekusi, maibé fatin klot fasilidade no ekipamentu balun aat totál,” nia informa iha ámbitu seremónia inaugurasaun iha Oekusi, kinta ne’e.
Tanba ne’e, iha Prezidente Autoridade RAEOA dahuluk Marí Alkatiri, indika fatin ida iha Alfándega Palaban hodi hela provizória, hodi hein konstrusaun foun ne’e. Maibé, durante konstrusaun ne’e la’o hamosu problema to’o ikus kazu ne’e konsege to’o iha Ministériu Públiku maibé iha rezultadu investigasaun laiha irregularidade.
“Tanba ne’e ohin ita-bele inaugura ona, STAE bele funsiona ho di’ak,” nia hateten.
Notísia relevante:Semana oin STAE atribui hikas kartaun biométriku hafoin suspende fulan-rua
Iha biban ne’e, Diretór Jerál STAE Elviro Fernandes Monis, konsidera ho edifísiu foun ne’e, sei hadi’a di’ak liután dezempeñu serbisu atendimentu públiku nian tantu périodu normál no eleisaun.
“Ho edifísiu foun ida-ne’e sei ajuda tebes STAE Oekusi, atu mellora desenpeñu servisu atendimentu publiku tantu iha períodu normál no mós eventu eleisaun sira, sá tan tinan oin ita tama ona ba iha tinan preparativu eleisaun prezidensiál no podér lokál, ne’ebé sei iha mobilizasaun materiál lojístika eleitorál mai iha fatin ne’e,” nia hateten.
Tanba ne’e, lori STAE nia naran agradese Ministérriu Administrasaun Estatál, tanba ho esforsa tomak bele konkretiza STAE nia mehi atu hetan edifísiu foun ida-ne’ebé adekuadu. Agradese mós ba Ministériu Planeamantu no Investimentu Estratéjiku ne’ebé ho disponiliza orsamentu liuhusi fundu infraestrutura hodi konstrui edifísiu STAE Oekusi.
“Agradese mós ba dirijente Sekretariadu Grande Projetu (SGP) dirijente no tékniku sira husi Ajénsia Dezenvolvimento Nasionál (ADN), Komisaun Nasionál Aprovizionamentu (CAN), dirijente no tékniku sira iha DNAIPDI, Autoridade RAEOA no kompaña konstrutora nu’udar responsavel ba konstrusaun obra ne’e,” nia orgullu.
Notísia relevante:CNE nota eleisaun órgaun suku iha Kutete-Monemeko la’o di’ak
Entretantu, konstrusaun edifísiu STAE Oekusi, ezekuta husi kompañia Mendith Unipesoál Lda ho valór kontratu $122,911.69.
Jornalista: Abílio Elo Nini
Editór: Rafael Ximenes de A. Belo
