KOVALIMA, 18 Dezembru 2025 (TATOLI) – Komandu Polísia Nasionál Timor-Leste (PNTL) Munisípiu Kovalima, daudaun-ne’e rejista ona membru PNTL efetivu iha Kovalima na’in-12 tama iha lista reforma obrigatóriu.
Komandante PNTL Munisípiu Kovalima, Superintendente Polísia Inacio Amaral, relata bazeia ba dadus membru PNTL efetivu na’in-12 maka nia idade tama iha lista reforma obrigratóriu bainhira atu tama iha 2025 ka iha 2026 ida-ne’e kompeténsia husi Governu no Komandu Jerál PNTL.
“ Tuir informasaun ne’ebé maka ita iha membru PNTL efetivu iha Kovalima hamutuk 160 inklui ho komandante. Husi númeru ita-nia membru PNTL ne’ebé tama iha lista idade reforma obrigatóriu hamutuk na’in-12”, Komandante PNTL Kovalima, Superintendente Polísia, relata dadus ne’e ba jornalista iha komandu PNTL Kovalima, Santa-Rosa ohin.
Komandante PNTL ne’e dehan, Komandu PNTL Kovalima rejista de’it lista membru PNTL efetivu na’in-12 nia naran tama ona iha lista idade reforma obrigatóriu, maibé desizaun iha Ministériu no komandu Jerál PNTL no membru sira preparadu hodi hein desizaun.
“Komandu anota membru efetivu na’in-12 maka tama iha lista reforma obrigatóriu no tama reforma iha 2025 ka 2026 ida ne’e kompeténsia Governu no Komandu Jerál PNTL. ami hein rejista naran ne’ebé aprovadu lista reforma no sira preparadu simu desizaun”, nia informa.
Tuir dadus Polísia Nasionál Timor-Leste Munisípiu Kovalima ne’ebé presta sira-nia servisu hodi fó seguransa ba komunidade Kovalima hamutuk 160 husi númeru balun koloka ba eskuadra postu administrativu hitu no balun presta sira-nia servisu iha komandu PNTL Kovalima.
Jornalista: Celestina Teles
Editór:Florencio Miranda Ximenes
