MOP realiza reflesaun hodi hakbi’it kualidade dezempenu servisu tinan 2025

DILI, 18 Dezembru 2025 (TATOLI)—Ministériu Obra Públika (MOP) realiza reflesaun ho objetivu atu hakbi’it kualidade servisu funsionáriu nu’udar servidór Estadu durante tinan 2025 nian.

Ministru Obra Públika, Samuel Marçal, hateten responsabilidade iha ministériu ida-ne’e importante tebes, responsabilidade ne’ebé jerente sira kaer ne’e liga direta ba povu nia moris no nasaun nia dezenvolvolvimentu tanba ko’alia kona-ba infraestrutura.

“Nune’e, ita presiza atu servisu maka’as tanba infraestrutura ne’ebé iha ita-nia reaponsabilidade mak sai hanesan baze ida ba setór sira seluk,” Ministru Sameul informa ba jornalista sira iha salaun Mahoka, Osindo, ohin.

Ministru ne’e dehan, signifika katak se jerente sira lahalo servisu maka’as ba área infraestrutura sei fó impedimentu ba prosesu dezenvolvimentu setór sira seluk hanesan edukasaun, saúde, turizmu no agrikultura.

Tamba ne’e, nia konsidera presiza eleva mákina Estadu atu halo funsionamentu ho di’ak, entaun nasaun ne’e atu la’o ba oin xave no destinu ne’e mak iha Ministériu Obra Públika, maske servisu durante ne’e ladun másimu maibé konsege atinje ona meta planu programa Governu nian.

“Ha’u fiar katak antes mandatu ramata ita-nia servisu bele konklui tuir meta ne’ebé ita iha, atu povu bele sente mudansa infraestrutura iha baze,” nia hateten.

Tanba ne’e, nia solisita ba instituisaun tutelada no forsa traballu (funsionáriu) sira hotu atu nafatin esforsu hatudu kualidade dezempeñu servisu ne’ebé di’ak iha tinan oin mai, maske dalaruma sempre mosu konflitu interna iha instituisaun maibé ne’e lasai kestaun atu impede servisu iha terenu.

Enkuantu atividade reflesaun ne’e mós iha ámbitu selebra natál hamutuk ho funsionáriu sira ne’ebé hakna’ar-an iha ministériu no marka mós prezensa husi lina ministeriál seluk hanesan MPIE, SEATOU, SEFOPE inklui parséria dezenvolvimentu.

Jornalista : Alexandra da Costa

Editór         : Cancio Ximenes