KOVALIMA, 19 Dezembru 2025 (TATOLI) – Servisu Munisipál Edukasaun (SME) Kovalima devolve orsamentu Implementasaun ba programa merenda eskolár (PME) hamutuk $284,123.49 ba kofre Estadu.
Diretora Servisu Munisipál Edukasaun Kovalima, Elda de Fátima informa, Edukasaun Kovalima devolve orsamentu PME ba kofre Estadu, tanba implementasaun PME hahú iha fulan Marsu, Janeiru no Fevereiru no la ezekuta orsamentu PME iha loron nasionál sira.
“ Ezekusaun orsamentu ba implementasaun programa merenda eskolár (PME) daudaun-ne’e ita atinje 90%, ezekuta orsamentu $982,857.51, tanba ita devolve fila orsamentu hamutuk $284,123.49 ba kofre Estadu”, Dirijente Edukasaun Kovalima Elda de Fátima relata dadus ne’e ba Jornalista iha Santa Rosa ohin.
Atu implemente PME iha 2025 ne’e, edukasaun Kovalima prevee orsamentu hamutuk $1,165.367.68 husi orsamentu ne’e aloka ba ensinu pre-eskolár hamutuk $121.168,32 ezekuta hotu, nune’e saldo laiha no tetu orsamentu ba ensinu báziku $1,278.029.00 husi orsamentu ne’e ezekuta $982,857.51 no saldo $ 284.123.49 devolve fali ba kofre Estadu.
Edukasaun Kovalima devolve orsamentu implementasaun PME ba kofre Estadu, orsamentu ne’ebé maka edukasaun Kovalima la halo levantamentu , nune’e orsamentu nafatin sei iha sistema.
Alunu ne’ebé maka benefisia ba implementasaun PME hamutuk 18,828 husi númeru ne’e kompostu husi alunu eskola pre-eskolár hamutuk 1,920, alunu husi ensinu báziku (EB) 16,828.
Realizasaun PME iha 2025 ne’e iha Kovalima, durante loron efetivu 148 ne’ebé maka implementa PME husi ekipa jestaun programa (EJP) 23 , durante ne’e ezekuta orsamentu PME iha munisípiu Kovalima rasik .
Jornalista: Celestina Teles
Editór:Florencio Miranda Ximenes
