KOVALIMA, 19 Dezembru 2025 (TATOLI) – Diretór Eskola Sekundáriu Jerál Públiku Suai, Fernando Ferreira, dehan eskola seidauk distribui formuláriu ba alunu finalista atu asesu ba ensinu superiór hanesan Universidade Nasionál Timor Lorosa’e (UNTL) .
“Tuir loloos hafoin fó sai rezultadu ezame nasionál, ohin ita distribui kedas formuláriu ba alunu finalista sira ne’ebé maka atu kontinua sira-nia estudu iha ensinu superiór Universidade Nasionál Timor-Loro Sa’e (UNTL)”, dirijnte Eskola Sekundáriu Jerál Públiku Suai, Fernando Ferreira, dehan ba jornalista sira, iha ESGP Suai, ohin.
Razaun eskola seidauk distribui formuláriu ba alunu finalista sira atu prenxe formuláriu hodi asesu ba UNTL, tanba eskola konvida inan-aman maka simu rezultadu ezame nasionál no alunu sira okupadu hodi rona sira nia rezultadu ezame nasionál.
Tuir planu loron 20 Dezembru 2025 ne’e, eskola sekundáriu públiku Suai sei distribui formuláriu ba alunu finalista atu prenxe, nune’e alunu finalista asesu ba ensinu superiór UNTL iha tinan letivu 2025-2026 .
Eskola fó sai ona rezultadu ezame nasionál kona-ba atu loke inskrisaun foun, eskola sei enkontru hamutuk ho inan-aman sira atu simu alunu bazeia fó sai iha jornal Repúblika katak eskola sekundáriu simu de’it alunu na’in-540.
“ Ho nune’e bainhira eskola loke inskrisaun, ami simu de’it alunu ho limitasaun ne’ebé maka fó sai ona husi jornal repúblika tanba Ministériu Edukasaun foin loke tan ona eskola sekundáriu jerál iha Fatumea, iha postu Tilomar, Fohorem no Zumalai,” nia informa.
Diretora Servisu Munisipál Edukasaun Kovalima, Elda de Fátima, esplika katak,Edukasaun Kovalima distribui ona formuláriu ba eskola nune’e eskola hein distribui ba alunu finalista atu asesu ba ensinu superior UNTL.
“Ita entrega ona formuláriu ba eskola sira nune’e distribui ba alunu finalista ne’ebé maka hakarak prense formuláriu ne’ebé maka la iha limitasaun atu asesu ba ensinu superiór UNTL” nia dehan.
Tuir dadus husi servisu Munisipál Edukasaun Kovalima alunu finalista iha 2025 ne’e hamutuk rihun 2,573 husi númeru ne’e bazeia ba rezultadu alunu ne’ebé maka pasa iha ezame nasionál hamutuk 2,540 maka aprovadu na’in 49 maka reprovadu.
Jornalista: Celestina Teles
Editór :Florencio Miranda Ximenes
