DILI, 19 Dezembru 2025 (TATOLI)—Ministru Negósiu Estranjeiru no Kooperasaun, Bendito dos Santos Freitas ho delegasaun hala’o enkontru ho delegasaun Organizasaun Polísia Kriminál Internasionál (INTERPOL, sígla inglés), hodi diskute kona-ba kooperaaun entre Timor-Leste ho organizasaun polísia kriminál internasionál ne’e.
Tuir nota ne’ebé Tatoli asesu haktuir, delegasaun INTERPOL hato’o sira-nia prontidaun atu tulun Timor-Leste iha área kapasitasaun rekursu umanu, nune’e bele eleva liután koñesementu iha área kombate korrpsaun, krime organizadu no krime transnasionál sira iha Timor-Leste.
Timor-Leste sai ona membru plenu iha ASEAN, tan ne’e, presiza eleva liután koñesementu pesoál sira liuhusi mekanizmu ASEAN nian hanesan iha Singapura no seluk tan ligadu ba utilizasaun intelijénsia artifisiál hodi halo análize no klasifika kategoria investigasaun ba krime sira hanesan transnasionál droga, fase osan (money laundry) no seluk tan.
INTERPOL mak organizasaun polísia internasionál boot liu iha mundu, rede globál ida-ne’ebé liga forsa polísia nasionál sira hodi fasilita kooperasaun no kombate krime transnasionál hanesan terorizmu, krime sibernétiku no krime organizadu ne’ebé sai hanesan pontu sentrál ida ba fahe dadus no koordenasaun esforsu sira.
Reuniaun ne’e hala’o durante iha Konferénsia Internasionál Antí Korrupsaun ne’ebé hala’o iha Doha, Qatar, ne’ebé akompañadu husi Deputada Parlamentu Nasionál, Virgínia Ana Belo, Diretór Nasionál Polísia Sientífika Investigasaun Kriminál (PCIC), Adjunta Prokuradora Jerál Repúblika, Angelina Saldanha, Komisáriu Komisaun Anti Korrupsaun, Rui Pereira dos Santos no seluk tan.
TATOLI
