DILI, 19 Dezembru 2025 (TATOLI)—Inpetór Jerál Jogu (IGJ), hahú husi kaneiru to’o Novembru 2025 ne’e, kontribui reseita millaun $3.473-resin ba kofre estadu husi fonte empreza jogu online no la online ne’ebé rejistadu husi Governu.
Inspetór Jerál Jogu, Anibal Carvalho Martins, hateten empreza jogu online no la online sira sempre hatama reseita ba lofre Estadu kada fulan, kompostu husi empreza balun ne’ebé Governu taka tiha ona mak hanesan empreza Dragon, Lotária, Amizade, Toto Bola, Kasino, BedFore Rudal no seluk tan.
“Maibé tanba rezolusaun Governu númeru 54 fulan-Outobru/2025 kona-ba taka atividade jogu online entaun hahú husi ne’ebá empreza sira lahatán ona reseita ba kofre Estadu, no bainhira empreza balun sei kontinua halo atividade entaun konsidera ne’e ilegál,” Inspetór ne’e informa ba Agência Tatoli liuhusi telefónika, ohin.
Dirijente ne’e afirma Inspesaun Jerál Jogu (IGJ) halo servisu operasaun buska ba atividade jogu online sira-ne’e servisu hamutuk ho ekipa konjunta Polísia Nasionál Timor-Leste (PNTL), Polísia Siéntifika Investigasaun Kriminál (PSIK) ne’ebé halo tuir de’it orden husi rezolusaun númeru 54 ne’ebé foindauk Governu aprova ona hodi halo operasaun ba atividade jogu online.
“Entaun liga ho asuntu Dragon nian, IGJ hakarak halo klarifika katak konsensionáriu Grand Dragon Lotária ne’e loos duni hetan lisensa legál husi Governu ho ninia atividade lotária versaun Singapura ho Cambodia hanesan mós empreza jogu sira seluk, maibé kona-ba suspensaun ne’e tanba iha diskonfia konsensionária Star Dragon ne’e utiliza fali empreza nia naran hodi hala’o prátika jogu online iha laran,” nia esplika.
Nia dehan, ho razaun ida-ne’e mak parte kompetente halo kedas buska aprensaun enkuantu daudaun kazu ne’e iha hela prosesu tribunál no hein de’it desizaun husi tribunal, karik evidénsia laiha sira sei reativa fali maibé karik evidénsia iha sei taka atividade iha empreza Grand Dragon Lotária.
“Ami sei halo servisu koordenasaun hodi halo operasaun liuliu ba kouter ki’ik sira-ne’ebé sei kontinua faan hanesan loke kounter jogu mesak no agora ami buka tuir hela ninia paradeiru bola ne’e dulas (putar) iha ne’ebé. Nune’e mós komunidade ne’ebé gosta sosa lotária ne’ebé sai hela hanesan jogu ilísitu no sei prosesa sira tuir dalan legal,” nia informa.
Dalabarak públiku kestiona kona-ba jogu lotária ne’e legál ne’ebé sira bele hala’o sira-nia atividade no kada fulan, halo hela kobra ba reseita enkuantu jogu ida ilegál ne’e maka jogu online ne’e no scanning ne’e krime fali ona tanba Governu nunka fó lisensa ba atividade scanning.
“Enkuantu kona-ba jogu lotária ho versaun Singapura iha empreza haat mak uza no agora suspende hela mak hanesan Amizade, Grand Dragon Lotária, Bedfore no Toto Fitun, maibé ami buka tuir hela tanba sira uza liña internet, sei buka tuir modelu jogu ne’e oinsá karik sira halo prátika hotu jogu online entaun ita sei prosesa tuir lei ne’ebé Governu hasai ona,” nia dehan.
Jornalista : Alexandra da Costa
Editór : Cancio Ximenes
