DILI, 19 Dezembru 2025 (TATOLI)—Kombatente Libertasaun Nasionál hosi Munisípiu Ainaru toba kalan rua iha resintu Ministériu Asuntu Kombatente Libertasaun Nasionál (MAKLN) nian tanba falla jestaun.
“Ha’u toba kalan rua iha resintu MAKLN tanba jestaun mak falla,” Kombatente Francisco Paulo dehan ba jornalista sira iha resintu MAKLN, Komoro, Sesta ne’e.
Nia dehan kalan rua toba iha resintu MAKLN ne’e sosa mesak hahán mak hodi han. Ema mai foto tau iha mídia sosiál maibé MAKLN nunka mai haree no pelumenus dadeer atende uluk ema ne’ebé toba iha-ne’e, lae.
Nia akresenta tuir oráriu ne’ebé ministériu fó-sai ne’e Munisípiu Ainaru iha loron daruak (Tersa, 16/12/2025) maibé to’o ona loron dahaat maibé seidauk hetan fixa pagamentu.
“Ho ida-ne’e ha’u hakarak dehan ba Ministériu kombatente atu haree ba ida-ne’e. Tanbasá mak labele atende uluk lai Aileu no Ainaru, tanba falla iha loron dahuluk ne’ebé tuir loloos tenke atende lai Aileu-Ainaru tiha lai mak semana oin hanesan ne’e tama ba Bobonaru ka Baukau. Jestaun ne’e mak halo ami idade ferik-katuas ona ne’e labele hamriik kle’ur no hamlaha lalais,” nia haktuir.
Notísia relevante: Reprezentante povu husu MAKLN hadi’a atendimentu fixa pagamentu ba kombatente
Nune’e mós, Kombatente Osório Pires “Moris Mesak”, dehan presiza iha pesoál ministériu relevante esplika kona-ba kestaun simu fixa pagamentu.
“Ha’u maihosi Bobonaru no toba de’it iha-ne’e. Ha’u-nia família Dili laiha, ne’ebé toba ne’e hodi hein fixa pagamentu. Depoiz, ema ne’ebé atu esplika ba ita kona-ba forma iha-ne’ebé mak simu fixa pagamentu ne’e laiha. Ne’ebé, ohin dadeersan kedas forma tiha iha-ne’e to’o besik meiudia ema dehan forma fali iha sorin entaun ha’u mai tiha mahon. Uitoan tan mak ba forma tanba hamlaha, kolen loos,” nia haktuir.
Nune’e, nia rekomenda ba funsionáriu ka tékniku ne’ebé atende fixa pagamentu ne’e tenke hatene, bolu uluk mak ema ne’ebé mai sedu ka toba iha fatin ne’e.
“Ita toba iha-ne’e ladún seguru tanba rai manas, susuk mós iha no ema barak ne’ebé barullu. Entaun, toba oras balun de’it. Ministériu Asuntu Kombatente tenke halo jestaun ne’ebé di’ak ba ami veteranu. Presiza hadi’a jestaun iha futuru. Labele ami iha-ne’e tiha maka foin fó oráriu. Ida-ne’e halo ita terus tebes,” nia ko’alia ho triste.
Entretantu, Veterana Angélica dos Borges, afirma bá-oin labele akontese hanesan ne’e, presiza halo jestaun liuliu oráriu kada munisípiu para veteranu la’o tuir oráriu no sei laiha problema hanesan daudaun akontese iha fatin ida-ne’e.
“Konsellu Kombatente Munisipál iha maibé pelumenus MAKLN bele fó-sai oráriu liuhusi ne’ebá mak ami la’o tuir, lae. Ami ferik ona maibé tenke la’o, hamriik no la han tuir oras, labele,” nia dehan.
Jornalista sira tenta konfirma asuntu ne’e ba Ministru Asuntu Kombatente Libertasaun Nasionál, Gil da Costa Monteiro “Oan-Soru ” maibé nia indika fali Diretór Nasionál Pensaun Subvensaun (DNPS) atu entrevista, más diretór mós dehan okupadu ho atendimentu ba veteranu sira.
Jornalista: Osória Marques
Editór: Xisto Freitas da Piedade
